नेकपा (एकीकृत समाजवादी) की स्थायी कमिटी सदस्य रामकुमारी झाक्रीले बुटवलको युवा संघको प्रशिक्षण भेलामा आफूले बोलेका कुराहरूको सन्दर्भमा सचिवालय बैठकमै कुरा राख्ने भन्दै निवेदन दिएकी छन्।
झाक्रीले पार्टी पदाधिकारीहरूले ‘बडीसेमिड’ गरेर हिंसात्मक ढंगले बोलिरहेको भन्दै आफूले युवा संघको भेलामा ‘सिनो बोकेर हिँड्न सकिँदैन, अर्ली महाधिवेशन गरेर अध्यक्ष फेरौं’ भनेको सन्दर्भबारे सचिवालय बैठकमै बोल्ने बताएकी हुन्।
अध्यक्ष माधवकुमार नेपाललाई सम्बोधन गरेर दिएको निवेदनमा उनले आफूले स्पष्टीकरणको पत्रसमेत नपाएको बताएकी छन्।
‘कमरेड अध्यक्ष! मैले असार १४ गते युवा संघ लुम्बिनी प्रदेशको भेला राखेका विचारहरूको सम्बन्धमा सार्वजनिक रूपमा विभिन्न टीकाटिप्पणीहरू भइरहेका छन्। यसैको प्रतिक्रिया स्वरूप हाम्रो पार्टीका जिम्मेवार पदाधिकारीहरू मिडिया र सोसल मिडिया र भर्चुअल प्लेटफर्ममा समेत मेरा विरूद्ध र राजनीतिक प्रतिशोधले व्यक्तिगत लान्छना लगाउँदै, मेरो व्यक्तिगत स्वास्थ्य र ‘बडीसेमिड’ गरेर हिंसात्मक ढंगले बोलिरहनु भएको छ। त्यसप्रति मेरो पनि ध्यानाकर्षण भएको छ,’ उनले भनेकी छन्।
यसरी उहाँहरू बोलिरहँदा पार्टी नेता र पार्टीलाई समेत क्षति भएको महसुस गरेको उनले बताएकी छन्।
पार्टी महासचिवले असार १५ गते निर्देशन जारी गरेपछि आफूले कहीँकतै प्रतिक्रिया नदिएको उनले भनेकी छन्।
‘पार्टीको मेरो तहको बैठकमा नै यो विषयमा कुरा राख्ने छु भनेर पनि चुप बसेको थिएँ। तर पार्टी केही जिम्मेवार सदस्य र पदाधिकारीहरू सुरूदेखि नै मिडियामा आएर निरन्तर बोलिरहनु भएको छ। प्रतिक्रिया दिइरहनु भएको छ। यो विषयमा मलाई स्पष्टीकरण सोधिनेछ, सोधिएको छ, सोधियो भन्ने जानकारी छ भन्ने जस्ता भ्रामक कुरा बोलिरहनु भएको छ। यो विषयमा मैले स्पष्ट गर्नु पर्ने नै हुन्छ,’ उनले भनेकी छन्।
आफूले सार्वजनिक टिप्पणीको स्पष्टीकरण दिने माध्यम सार्वजनिक मिडिया बनाउन नचाहेको उनको भनाइ छ।
‘कतिपय पदाधिकारीले त अनुशासन आयोगले स्पष्टीकरण सोधिसक्यो पनि भनिसक्नु भएको छ। तर मलाई यस्तो कुनै लिखित पत्र वा मौखिक प्रश्न वा स्पष्टीकरण कसैले र कुनै कमिटीले पनि सोधेको थाहा छैन। जिम्मेवार पदाधिकारीले सार्वजनिक रूपमा व्यक्त भ्रामक कुराले मलाई भन्दा धेरै पार्टीलाई क्षति भएको महसुस गरेको छु। तसर्थ मेरा अभिव्यक्तिबारे उठाइएका हर प्रकारका प्रश्नहरूको जबाफ वा स्पष्टीकरण दिने ठाउँ चलिरहेको सचिवालयको बैठक पनि हो भन्ने ठानेकी छु,’ उनले पत्रमा लेखेकी छन्।
अर्को कमिटी बैठक पर्खिंदासम्म धेरै नराम्रो सन्देश जाने उनको ठहर छ।
‘त्यहाँ के भएको हो र मैले अभिव्यक्त गरेका विचार के हुन भन्ने सन्दर्भमा बैठकमा उपस्थित भई स्पष्ट गर्ने मौका प्रदान गर्नहुन हार्दिक अनुरोध गर्दछु’ सम्मानित नेता झलनाथ खनाल, महासचिव घनश्याम भूसाल र संगठन विभाग प्रमुख बेदुराम भुसाललाई बोधार्थ दिइएको पत्रमा उल्लेख छ।
-1746009348.jpg)
