अन्ततः युक्रेनका राष्ट्रपति भोलोदिमिर जेलेन्स्की कालो सुट लगाएर ह्वाइट हाउस पुगेका छन्।
अमेरिकी राष्ट्रपति डोनाल्ड ट्रम्पसँग वार्ता गर्न जेलेन्स्की र युरोपका सात नेता सोमबार ह्वाइट हाउस पुगेका थिए।
रूसी राष्ट्रपति भ्लादिमिर पुटिनसँग अमेरिकाको अलास्कामा शुक्रबार छलफल गरेपछि ट्रम्पले सोमबार ह्वाइट हाउसमा जेलेन्स्की र युरोपेली नेताहरूसँग कुराकानी गरेका हुन्।
यसपटक ह्वाइट हाउस आउँदा जेलेन्स्कीले औपचारिक सुट लगाउन भनेर ट्रम्पको कार्यालयले सन्देश पठाएको अमेरिकी पत्रिका वाल स्ट्रिट जर्नलले जनाएको थियो। ह्वाइट हाउसको प्रोटोकल कार्यालयले सो सन्देश पुर्याएको जर्नलले लेखेको छ।
गत फेब्रुअरीको अन्त्यमा ह्वाइट हाउसमा ट्रम्प र जेलेन्स्कीबीच भएको वार्ता वाकयुद्धमा परिणत भएको थियो। राम्ररी चलिरहेको जस्तो वार्ता एकाएक बिग्रिँदै भनाभनमा परिणत भएको थियो।
त्यसको एउटा कारण जेलेन्स्कीले लगाएको लुगा थियो। त्यो बैठकमा जाँदा पनि जेलेन्स्कीले सुट लगाएको भए राम्रो हुन्थ्यो भनेर ट्रम्पको सचिवालयले भनेको थियो। रियालिटी टिभी र ग्ल्यामरको दुनियाँबाट आएका राष्ट्रपति ट्रम्प ‘ड्रेस कोड’को खुब ख्याल गर्छन्।
त्यो बेला जेलेन्स्कीलाई ह्वाइट हाउसमा स्वागत गर्दा पनि ट्रम्पले उनको लुगाबारे हलुका घोचपेच गरेका थिए।
पछि पत्रकार सम्मेलनमा एक जना अमेरिकी पत्रकारले जेलेन्स्कीलाई औपचारिक सुट नलगाएर ‘तिमीले अमेरिकी राष्ट्रपति कार्यालयको अपमान गरिरहेका छैनौ?’ भनेर सोधेका थिए।
त्यही पत्रकार सम्मेलनमा उपराष्ट्रपति जे.डी. भान्सले जेलेन्स्कीले ह्वाइट हाउसमा आएर ‘लेक्चर’ दिएको र सो कार्यालयको अपमान गरेको आरोप लगाए। त्यसपछि ट्रम्पले जेलेन्स्कीलाई बोल्न समेत नदिई आफू एक्लै बोलेका थिए। उनले जेलेन्स्कीसँगका त्यसपछि भएका सबै बैठक रद्द गरे। र जेलेन्स्कीलाई ह्वाइट हाउस छाड्न भनियो।
युक्रेन युद्ध सुरू भएदेखि नै राष्ट्रपति जेलेन्स्कीले औपचारिक पोशाक लगाउन छाडेका थिए। उनी सैनिकको जस्तो बुट, प्रायः खैरो रङको प्यान्ट, फूलबाहुला भएका कालो वा फिक्का हरियो रङको स्वेटर वा भेष्ट लगाउने गर्थे।
उनको यो पोशाकलाई युक्रेनमा युद्ध जारी रहेको प्रतीक र उनका सैनिकहरू प्रतिको एक्यबद्धताका रूपमा सबैले स्वीकार गरेका थिए, मन पराएका थिए। ट्रम्पभन्दा अगाडिका अमेरिकी राष्ट्रपति जो बाइडेनसँग पनि जेलेन्स्कीले कयौं पटक ह्वाइट हाउसमा भेट गरेका थिए। अमेरिकी कंग्रेसलाई उनले सम्बोधन गरेका थिए। तर त्यो बेला पनि उनले कहिल्यै सुट लगाएनन्। संसारका सबै नेतालाई भेट्न उनले अनौपचारिक पोशाक नै लगाए।
उनको पोशाकको छनोटलाई कसैले प्रश्न गरेको थिएन, सम्मान नै गरेका थिए।
ट्रम्प राष्ट्रपति भएपछि भने ह्वाइट हाउसको माहोल बदलिन थाल्यो। हुँदाहुँदा उनको पोशाकको विषयलाई लिएर गत फेब्रुअरीमा उनलाई अपमान नै गरियो।
यसपटक फेरि पनि जेलेन्स्कीले सुट लगाउन् भन्ने ट्रम्पको चाहना थाहा पाएपछि उनले अन्ततः त्यो चाहना पनि पूरा गरिदिए। तर परम्परागत सुट र टाइ भने उनले लगाएनन्।
उनी सोमबारको बैठकमा कालो रङको कोट, प्यान्ट र कालै रङको सर्ट लगाएका थिए। उनको कोटमा बाहिरपट्टि तलमाथि ठूला–ठूला दुईटा पकेट थिए। कालो सर्टको बटन घाँटीसम्म नै लगाएका थिए।
उनी सुटमा त थिए, तर कताकता उनको सुटले ‘म युद्ध जारी रहेको राष्ट्रको राष्ट्रपति हुँ’ पनि भनिरहेको भान हुन्थ्यो।
जेलेन्स्कीले यसपटक सुट लगाएपछि ट्रम्प खुसी भए। ह्वाइट हाउसको पत्रकार सम्मेलनमा त्यही पत्रकारले जेलेन्स्कीको प्रशंसा गरे जसले पाँच महिना अघि उनलाई राष्ट्रपति कार्यालयको अपमान गरेको भन्दै प्रश्न गरेका थिए।
हिजो राष्ट्रपति ट्रम्पसँग पत्रकार सम्मेलनमा बसेका जेलेन्स्कीलाई त्यही पत्रकारले भने, ‘राष्ट्रपति जेलेन्स्की, तिमी सुटमा गजब देखिएका छौ। राम्रो देखिएका छौ।’
राष्ट्रपति ट्रम्पले जेलेन्स्कीको पाखुरामा हलुका धाप मार्दै भने, ‘मैले पनि त्यही भनेको।’
अनि थपे, ‘तिमीलाई पाँच महिना अघिको पत्रकार सम्मेलनमा आक्रमण गर्ने पत्रकार उही नै हो।’
जेलेन्स्कीले पत्रकारतिर हेरेर थोरै हाँस्दै भने, ‘मैले तिमीलाई सम्झेको छु।’
पत्रकारले तुरुन्तै भने, ‘म त्यो बेलाको लागि माफी माग्छु। राष्ट्रपति जेलेन्स्कीलाई मेरो पहिलो प्रश्न…’
उनले वाक्य पूरा गर्ने पाएका थिएनन्, जेलेन्स्कीले उनीतिर औंला सोझ्याउँदै र हाँस्दै भने, ‘हेर, तिमी त्यही सुटमा छौ।’
सँगै बसेका ट्रम्प पनि मजाले हाँसे।
जेलेन्स्कीले पत्रकारतर्फ हेर्दै र हाँस्दै फेरि थपे, ‘देख्यौ, मैले फेरे, तिमीले फेरेनौ।’
त्यसपछि कोठामा झनै हाँसो फैलियो।
राष्ट्रपति ट्रम्पसँग यसपटक भेट्दा फेरि आफूले लगाउने लुगा मुद्दा बन्छ भन्ने जेलेन्स्कीलाई सायद थाहा थियो।
सायद उनले त्यसको तयारी गर्न थालेका थिए।
यसअघि जेलेन्स्कीले पोप फ्रान्सिसको दाहसंस्कार, बेलायती प्रधानमन्त्री केयर स्ट्रार्मर र नेटोको बैठकमा पनि यसपटक लगाए जस्तै कालो सुट लगाएका थिए।
-1755578949.jpg)
-1746009348.jpg)
