नेपाली कांग्रेसका संस्थापन पक्षधर महाधिवेशन प्रतिनिधी एवं कार्यकर्ताहरूले महामन्त्री गगन थापाले आफ्नो जिम्मेवारी पूरा गर्न नसकेको आरोप लगाएका छन्।
पार्टीको १५ औं महाधिवेशनका लागि क्रियाशील सदस्यता नवीकरण तथा नया सदस्यता वितरणसम्बन्धि समितिको संयोजक भएर थापाले जिम्मेवारी पूरा नगरेको उनीहरूले बताएका हुन्।
महामन्त्री थापाले आफ्नो जिम्मेवारी पूरा गर्न नसक्दा विशेष महाधिवेशनको प्रसंग ल्याएर कमजोरी ढाकछोप गर्न खोजेको पनि उनीहरूको आरोप छ।
पोखरामा बुधबार भएको संस्थापन पक्षधरको भेलामा बोल्दै अधिकांश महाधिवेशन प्रतिनिधीहरूले आ–आफ्नो भागको जिम्मेवारी लिन आग्रह पनि गरेका छन्। भेलाको सभापतित्व गरेका कांग्रेस गण्डकीका उपसभापति मेखलाल श्रेष्ठले विशेष महाधिवेशनबाट युवा पुस्ताको प्रतिनिधित्व हुन नसक्ने बताए।
‘तपाई क्रियाशील सदस्यता दिनुहुन्न, कसरी समेट्नुहुन्छ युवा पुस्ता,’ उनले भने, ‘आमुल परिवर्तन भन्नेहरूले क्रियाशील सदस्यता बाँड्ने हो। नयाँ प्रतिनिधित्व ल्याउने हो, क्रियाशील सदस्यता नविकरण र नयाँ सदस्यता वितरण कहिले हुन्छ?’
उपसभापति श्रेष्ठले सदस्ता नवीकरण, नयाँ सदस्यता वितरणको जिम्मेवारी लिनेदेखि महाधिवेशनको काम गर्न नसक्ने केन्द्रीय पदाधिकारी तथा सदस्यहरूले राजिनामा दिनुपर्ने माग राखे।
‘पार्टी सदस्यता नवीकरण किन नगरेको। नयाँ सदस्यता किन नदिएको। त्यसको दोषी को हो,’ महामन्त्री थापालाई लक्षित गर्दै उनले भने, ‘महाधिवेशनका लागि जुन तदारूकता देखाउनुपर्थ्यो, त्यो गर्नुभएन। त्यसको जिम्मेवारी लिएर राजिनामा दिनुपर्छ।’
कांग्रेसले १५ औं महाधिवेशनका लागि सदस्यता नवीकरण र नयाँ सदस्यता वितरण गर्ने समितिको संयोजक महामन्त्री थापालाई दिएको भन्दै उनले उक्त जिम्मेवारी अहिलेसम्म पनि पूरा गर्न नसेकेको उनले बताए। महामन्त्री थापाले यसअघि पोखरा आएर चैत १५ गतेभित्र सदस्यता नवीकरण सक्ने र वैशाखभित्र नयाँ सदस्यताको टुंगो लगाउने भाषण गरे पनि काम गर्न नसकेको उनले आरोप छ।
महाधिवेशन लगायतका काम गर्न केन्द्रीय सभापतिदेखि पदाधिकारी र केन्द्रीय सदस्य सबैले आ–आफ्नो भागको जिम्मेवारी लिएर राजिनामा दिनुपर्ने पनि उनले बताए। पार्टीको केन्द्रीय समितिदेखि वडा तहसम्मको कार्यसमिति भंग गरेर तदर्थ महाधिवेशन आयोजक समिति बनाउनुपर्ने पनि उनले माग राखे।
सरकारले फागुन २१ गतेका लागि तोकेको निर्वाचन सयममै हुने हो भने चुनावअघि महाधिवेशन सम्भव नभएको र चुनावको मिति सार्ने हो भने फागुन, चैतसम्म महाधिवेशन गर्न कार्यतालिका ल्याउनुपर्ने पनि उनको माग छ।
विशेष महाधिवेशनको व्यवस्थाको व्याख्या गर्न जरूरी रहेको भन्दै उनले विशेष महाधिवेशनबाट जेनजी आन्दोलनको भावनाअनुसार युवा पुस्ता आउन नसक्ने बताए।
‘वडादेखि जिल्ला, प्रदेश र केन्द्रीय समितिमै नयाँ नेतृत्व चाहिएको छ। पुरानै प्रतिनिधिको महाधिवसन भेला बोलाएर जेन-जीको चाहनाअनुसार युवा पुस्ता कसरी कांग्रेसमा आउँछ,’ उनले भने।
भेलामा बोल्दै गण्डकी प्रदेश सांसद एवं बागलुङ जिल्ला कार्यसमिति सभापति जित शेरचनले पार्टीमा आलोचना गर्न नपाइने अवस्था आएको बताए। कांग्रेसभित्र आलोचना र समिक्षा केन्द्रदेखि तल्लो तहसम्मै आवश्यक परेको भन्दै उनले आलोचना र समिक्षामा लाग्न पार्टी कार्यकर्तालाई आग्रह गरे।
‘पूर्वराजा ज्ञानेन्द्र शाह, केपी ओली, प्रचण्डका बारेमा आलोचना भयो भने त्यो पार्टीबाट निकाल्छन्, उनीहरुले बस्न दिँदैनन्,’ उनले भने, ‘नेपाली काग्रेसमा मात्र आलोचना गर्न पाइन्छ, त्यो पनि रोक्ने कोसिस भइराखेको छ।’
शेरचनले पनि पार्टीको नियमित महाधिवेशन वैशाखमा गर्नुपर्ने र फागुनमा चुनाव नहुने हो भने महामन्त्री थापाले पेश गरेको कार्यतालिका अनुसार नै महाधिवेशन गर्न सकिने धारणा राखे।
‘केन्द्रमा २, ४ जनाको टाउको फेर्ने मात्र महाधिवेशन चाहिएको होइन, वडादेखि जिल्ला र प्रदेशमा पनि चाहिएको छ,’ उनले भने, ‘छिटो चाहियो भन्दैमा हामी दास होइन, विवेकले चल्ने राजनीति जानेर आएको हो।’
पोखरामा गरे जस्तो भेला देशभर गर्ने भन्दै उनले पार्टी सभापति शेरबहादुर देउवाले कार्यवहाक सभापति दिए पनि अहिलेसम्म केन्द्रीय समितिले कुनै निर्णय लिन नसकेको बताए। उनले पनि पार्टीको सबै संगठन भंग गरेर महाधिवेशन आयोजक समिति बनाउन माग गरे।
भेलाका अर्का वक्ता डोटीका महासमिति सदस्य पुष्प शाहीले पार्टी सभापति शेरबहादुर देउवामाथि खनिएको भन्दै नेताहरुको आलोचना गरे। उनले पनि पार्टीमा विशेष महाधिवेशन नभई नियमित महाधिवेशन हुनुपर्ने धारणा राखेका थिए।
गण्डकी प्रदेशबाट नेपाली कांग्रेसको महाधिवेशन प्रतिनिधि करिब ४५० जना छन्। बुधवार भएको संस्थापन पक्षकाे भेलामा १०० जना जति उपस्थित भएको भेलाका आयोजक प्रदेश उपसभापति श्रेष्ठले बताए।
-1746009348.jpg)
