नेपाली कांग्रेसमा विशेष महाधिवेशन मागेर हस्ताक्षर बुझाएका महाधिवेशन प्रतिनिधिहरूले आज महिला भेला गरेका छन्।
बिहीबार काठमाडौंको नयाँ बानेश्वरस्थित थापागाउँमा रहेको अर्पण ब्याङ्केटमा उनीहरूले भेला गरेका हुन्। भेलामा केन्द्रीय सदस्य प्रतिमा गौतम, सपना राज भण्डारी जोशीलगायत सहभागी छन्।
कांग्रेसका ४७४३ महाधिवेशन प्रतिनिधिमध्ये २४८८ जना महाधिवेशन प्रतिनिधिहरूले विशेष महाधिवेशन माग गर्दै गत असोज २९ गते नै कार्यवाहक सभापति पूर्णबहादुर खड्कालाई हस्ताक्षर बुझाएका थिए।
तर पदाधिकारी तथा पूर्व पदाधिकारीहरूले विशेष महाधिवेशन भन्दा नियमित महाधिवेशनमै जोड दिएका छन्। जसले गर्दा विशेष महाधिवेशन हस्ताक्षर सनाखत गरी त्यसको प्रक्रिया अघि बढ्न सकेको छैन।
कांग्रेस केन्द्रीय कार्यसमिति बैठकले नियमित महाधिवेशनको कार्यतालिका पनि सर्वसम्मत रुपमा ल्याउन सकेको छैन। आज पनि केन्द्रीय समिति बैठक जारी छ।
यस्तो अवस्थामा विशेष महाधिवेशन माग गरेका महाधिवेशन प्रतिनिधिहरूले प्रक्रिया अघि बढाउन आग्रह गरिरहेका छन्।
चुनावअघि १५ औं महाधिवेशन नहुने हो भने विधान अनुसार विशेष महाधिवेशन गर्नुपर्ने पक्षमा महामन्त्रीद्वय गगन थापा र विश्वप्रकाश शर्मा लगायत नेताहरु छन्। विधानअनुसार ३ महिनाभित्र विशेष महाधिवेशन गर्नुपर्ने हुन्छ।
सभापति शेरबहादुर देउवा पक्षका केही पदाधिकारी र केही पूर्व पदाधिकारीहरू भने चुनाव गरेर वैशाखमा मात्रै महाधिवेशन गर्न सकिने बताउँदै आएका छन्।
कांग्रेसको महाधिवेशन कार्यतालिका आउन ढिलाइ हुँदै गर्दा विशेष महाधिवेशन पक्ष र नियमित महाधिवेशन पक्षले काठमाडौं लगायत विभिन्न ठाउँमा छुट्टाछुट्टै भेला गर्दै आएका छन्।
तस्बिरहरू:
-1746009348.jpg)
