गृहमन्त्री ओमप्रकाश अर्यालले भदौ २३ र २४ गतेको घटना योजनाबद्ध भए/नभएको विषय जाँचबुझ आयोगले सम्बोधन गर्नुपर्ने बताएका छन्।
बिहीबार राष्ट्रिय सभा अन्तर्गतको संघीयता सबलीकरण तथा राष्ट्रिय सरोकार समितिमा बोल्दै उनले घुसपैठ वा योजनाबद्ध भएको विषयमा पूर्वन्यायाधीश गौरीबहादुर कार्की नेतृत्वको आयोगले सम्बोधन गर्ने अपेक्षा रहेको बताए।
‘आन्दोलनमा विभिन्न किसिमको घुसपैठ अथवा अरू राष्ट्रिय वा अरू स्वार्थ थियो भन्ने जिज्ञासा आएको छ। यो आयोगले बताउनुपर्छ। आयोगले यस विषय पनि सम्बोधन गर्नुपर्छ भन्ने सरकारको धारणा रहन्छ,’ उनले भने, ‘जेनजी पुस्ताले आन्दोलन गरे तर बीचमा अरू कसैको कुनै योजनाबद्ध केही पो थियो कि, त्यो कुरा पनि मिसिएर यो क्षति धेरै बढाउने कुरा भयो कि भन्ने जुन जिज्ञासा छ, यसलाई आयोगले सम्बोधन गरोस् भन्ने हामीले अपेक्षा राख्दछौं।’
उनले भदौ २३ र २४ गतेको घटनालाई सोलो डोलो रूपमा सरकारले नहेरेको पनि बताए। त्यस्तै कतिपय सांसदहरूले संविधानमाथि उठेका प्रश्नबारे पनि गृहमन्त्री अर्यालले जबाफ दिएका थिए।
उनले कुनै पनि सुधारका काम संविधानलाई टेकेर नै हुने बताए। संविधान अनुसार नै निर्वाचन हुने र संरचनागत सुधार गर्नका लागि पनि संसद नै चाहिने उनले बताए।
‘अब संविधानमा सुधार गर्ने कुराहरू छन् भने संरचनागत सुधार पनि हुन सक्छन्। त्यो गर्नलाई पनि संसदमै आउनुपर्छ, संसदमै दुई तिहाइ ल्याउनुपर्छ। अब जनमत संग्रहमा जाने हो भने पनि संसदमार्फत नै त्यो कुरा हुन्छ, फेरि जनमत संग्रहको परिणामलाई पनि संस्थागत गर्नलाई संसद नै चाहिन्छ,’ उनले भने।
-1746009348.jpg)
