बिहार बिधानसभाका २४३ वटै निर्वाचन क्षेत्रको मतगणना जारी छ।
अधिकांश निर्वाचन क्षेत्रको मतगणना बिहान ८ बजेदेखि सुरू भएको थियो। केही क्षेत्रमा भने केही ढिला गरी सुरू भएको थियो।
बिहान १० बजेसम्ममा सबै ठाउँबाट मतगणनाको प्रारम्भिक नतिजासमेत सार्वजनिक भएको भारतीय अनलाइन हिन्दुस्तान टाइम्सले जनाएको छ।
२४३ वटै निर्वाचन क्षेत्रको प्रारम्भिक नतिजामै भारतीय जनता पार्टी (भाजपा) र जनता दल युनाइटेड (जेडियू)ले बहुमत कटाएको छ।
बहुमतका लागि १२२ सिट जित्नुपर्छ। एनडिएले बहुमतको सीमा कटाएर १६२ सिटमा अग्रता लिइरहेको हिन्दुस्तान टाइम्सले जनाएको छ।
त्योमध्ये ७६ सिटमा जेडियू र ६९ सिटमा भाजपाका उम्मेदवारले अग्रता लिएका छन्।
योसँगै जेडियू अध्यक्ष नितिश कुमार दसौं पटक बिहारको मुख्यमन्त्री बन्ने निश्चित रहेको भारतीय सञ्चारमाध्यमहरूले जनाएका छन्।
महागठबन्धन भने प्रारम्भिक चरणमै धेरै पछि परेको छ।
यो गठबन्धनमा राष्ट्रिय जनता दल (आरजेडी), कंग्रेस, भारतीय कम्युनिस्ट पार्टी, कम्युनिस्ट पार्टी अफ इन्डिया (मार्क्सवादी), कम्युनिस्ट पार्टी अफ इन्डिया (माले) र विकासशील इन्सान पार्टी सामेल छन्।
महागठबन्धनले बिहारका चर्चित नेता लालुप्रसाद यादवका कान्छा छोरा ३५ वर्षीय तेजस्वी यादवलाई मुख्यमन्त्री घोषणा गरेर चुनाव लडेको थियो।
प्रारम्भिक नतिजाअनुसार महागठबन्धनले ६८ सिटमा अग्रता लिएको छ। त्योमध्ये ५० सिटमा आरजेडी र १२ सिटमा कंग्रेसका उम्मेवार अगाडि छन्।
पहिलोपटक चुनाव लडेको जनसुराज पार्टीले २ सिट र अन्य दलहरुले १२ सिटमा अग्रता लिएका छन्।
दुवै चरणको मतदान सकिएपछि विभिन्न एक्जिट पोलहरुले यसपालि पनि एनडिएले बहुमत पाउने प्रक्षेपण गरेका थिए।
-1746009348.jpg)
