नेपाल कांग्रेसका महामन्त्री गगन थापाले मुलुकको अहिलेको समस्या समाधानका लागि कांग्रेस नै अग्रसर बन्नुपर्ने खाँचो औंल्याउँदै एमालेबाट सम्भव नहुने बताएका छन्।
एमालेले अहिलेको समस्या समाधान गर्न र मुलुकको नेतृत्व गर्नै नसक्ने दाबी गर्दै महामन्त्री थापाले कांग्रेस र एमालेबीचको चरित्र नै फरक भएको टिप्पणी गरेका हुन्।
केन्द्रीय कार्यसमिति बैठकमा बिहीबार बोल्दै थापाले एमालेभन्दा कांग्रेस किन भिन्न हो भन्ने आफ्नो तर्क पेस गरेका हुन्।
महामन्त्री थापाका अनुसार भदौ २३–२४ को जेनजी आन्दोलनपछिको अवस्थामा मुलुकका अघि मुख्यतः तीन विकल्प छन्।
‘पहिलो ध्रुवीकरण अझै बढ्ने, थप हिंसा बढ्ने,’ उनले भने, ‘दोस्रो, भदौ २३ गते भन्दा अगाडिको केही सामान्य टालटुल भएर जाने।’
थापाले यी दुइटै कुराले नेपाललाई अगाडि बढ्न नदिने ठहर सुनाउँदै थपे, ‘हामी तेस्रो बाटोमा जानुपर्छ। तेस्रो बाटो भनेको अहिलेको असन्तुष्टिहरूलाई पनि सम्बोधन गर्दै त्यसलाई सम्हाल्दै यो संविधानलाई पनि जोगाउँदै , प्रणालीलाई पनि जोगाउँदै जानुपर्छ र यो काम नेपाली कांग्रेस पार्टीले नै गर्नुपर्छ अरू कसैले गर्न सक्दैन।’
महामन्त्री थापाले अगाडि भने, ‘नेकपा एमालेले त सक्दैन। एमालेको यस्तो चरित्र नै होइन। एमालेले उत्तेजना फैलाउन सक्ला। तर, अहिलेको समस्या समाधान गर्न सक्दैन।’
संविधान सभाकालको प्रसंग निकालेर उनले नेताहरूबीच तुलना पनि गरे।
एमाले अध्यक्ष केपी शर्मा ओलीले बोलेको देखेर कतिपयलाई कांग्रेस नेताहरूले पनि त्यस्तै बोलिदिए हुने भन्ने लाग्ने गरेको प्रसंग झिक्दै थापाले विगतमा आफूलाई पनि त्यस्तै लाग्ने गरेको सुनाए।
‘त्यसबेला केपी ओली खुट्टा कमाउने होइन, दुई तिहाइ बहुमत छ, माओवादीलाई देखाइदिने हो भन्नुहुन्थ्यो,’ थापाले भने, ‘हाम्रो सुशील दाइ (सुशील कोइराला) पनि बोल्नुहुन्थ्यो। तर, उहाँले बोलेको पनि राम्रोसँग बुझिन्नथ्यो। त्यसबेला नेता त ओली जस्तो हुनुपर्छ भन्ने हामीलाई लाग्थ्यो।’
त्यो बेलामा माओवादीलाई विश्वासमा लिएर संविधान जारी गर्ने ठाउँसम्म ल्याउने काम भने कांग्रेसकै नेतृत्वमा भएको उनको भनाइ थियो।
‘हाम्रो चरित्र त्यो हो नि! हाम्रो क्यारेक्टर एमालेको जस्तो होइन,’ उनले भने, ‘एमाले जस्तो हुन केही गाह्रो छैन। एमाले जसरी आइज, म अहिले देखाइदिन्छु, आइज को छ भनेर भन्नलाई केही गाह्रो छैन। त्यसले अहिलेको अवस्था सम्हालिन्छ र?’
कांग्रेसको चरित्र पनि त्यस्तै हो भन्ने ठान्ने हो भने गलत ठाउँमा पुगिने उनको भनाइ छ।
‘हाम्रो चरित्र त्यो होइन। हामीले त अहिले राष्ट्रिय संवाद गर्नुपर्छ। बहुपक्षीय संवाद गर्नुपर्छ,’ थापाको भनाइ थियो, ‘सबै दलसँग, जेनजी आन्दोलनमा लागेका मान्छेसँग संवाद गर्नुपर्छ। सरकारसँग गर्नुपर्छ। यो काम कांग्रेसले गर्नुपर्छ।’
२०४६ सालले प्रजातन्त्र र ६२–६३ले त्यसमा थपेर समानुपातिक समावेशीता लगायतका कुरा थपेर लोकतान्त्रिक गणतन्त्र दिएको उल्लेख गर्दै उनले अहिले भ्रष्टाचार, सुशासन र पारदर्शीताका लागि जबरजस्त सन्देश दिएको बताए।
‘अब यो कुराहरूलाई थपेर हामी संविधान पनि जोगाउने, प्रणाली पनि जोगाउने र राम्रा कुराहरू थप्ने कुरा हामीले गर्नुपर्छ,’ थापाले थपे, ‘अब नयाँ कुरा थप्ने हामी गर्छौं नेतृत्व। हामीले सम्हाल्छौं। हाम्रो भाषा यो हुनुपर्छ। हाम्रो टोन यो हुनुपर्छ।’
सँगै उनले प्रश्न पनि गरेका छन्, ‘के यो गर्नुपर्छ भनेर भन्दै गर्दा हामीलाई आज पत्याउने अवस्था छ?,’ आजको मुख्य प्रश्न यही भएको उल्लेख गर्दै उनले यहीँनेर महाधिवेशनको विषय पनि आउने बताए।
‘यहाँ हाम्रो महाधिवेशनको प्रश्न पनि हो। अहिले हामीलाई पत्याउने अवस्था छ? हाम्रो नैतिक प्राधिकार जुन हो त्यो सबभन्दा ठूलो कुरा थियो। नैतिक प्राधिकार आजको दिनमा हामीले गुमाएका छौं,’ उनले भने, ‘हामी ठिक ठाउँमा उभियौं भने मात्रै अरूलाई पनि ठिक ठाउँमा उभिनका निम्ति हामी भन्न सक्छौं। महाधिवेशन त्यो अवसर हो।’
पार्टीले महाधिवेशनमार्फत् व्यापक संवाद गर्ने उल्लेख गर्दै उनले थपे, ‘पार्टीले जनतालाई यो त्यही कांग्रेस होइन। यो फरक कांग्रेस हो भन्नेछ। तिमी मसँग रिसाएका छौ, मैले तिम्रो कुरा सुने। मैले यी कुरा सच्याउँछु भन्नेछ।’
-1746009348.jpg)
