पछिल्लो समय राष्ट्रिय स्वतन्त्र पार्टी (रास्वपा) परित्याग गर्ने नेताहरूको लहर चलेको छ। पूर्वसचिवालय सदस्य सुमना श्रेष्ठदेखि प्रमुख सचेतक सन्तोष परियारले अलग यात्रा तय गरिरहँदा रास्वपाभित्र हलचल मच्चिएको छ।
पहिलो महाधिवेशन नै नगरी पार्टीबाट एक एक मानिस किन चुहिइरहेका छन् भनेर हामीले पार्टीका महामन्त्री कविन्द्र बुर्लाकोटीसँग कुराकानी गरेका छौं —
रास्वपाबाट धमाधम नेताहरू बाहिरिँदै छन्, यसलाई पार्टीले कसरी लिएको छ? नेताहरू अवसर खोज्न बाहिरिएका हुन् कि तपाईंहरूले उनीहरूको क्षमता उपयोग गर्न नसक्नुभएको?
मुलुकको राजनीति तरल छ। त्यसैले पार्टी छाड्ने र नयाँ जोडिने क्रम चलिरहेको छ।
बाहिरिने साथीहरूले पार्टी र संगठनमा सामान्य कुराहरू राख्नुभएको थियो। तर त्यही विषय छलफलमा एजेन्डाकै रूपमा प्रस्तुत गर्नुभएको थिएन।
हामीले पार्टीभित्र आन्तरिक रूपमा यसको समीक्षा गर्नुपर्नेछ। यो कुरा मनन् पनि गरेका छौं। पार्टी बन्नका लागि हुनुपर्ने गतिविधिहरूको र पार्टीकै आन्तरिक समीक्षा पनि गर्नुपर्छ भन्ने मलाई लाग्छ।
अहिले छाड्नुभएका साथीहरूले फरक विचार राखेर, उहाँहरूको विचार पारित नभएर वा त्यसलाई कुनामा पार्ने काम गरिएर छाड्नुभएको होइन। अहिलेको राजनीतिक ध्रुवीकरणले यसलाई अलि अलि निर्देशित गरेको हो कि भन्ने लाग्छ।
पार्टी पुनर्गठनको मुद्दा उठाइएकाले नै उनीहरू पाखा लगाइएका हुन् कि?
यहाँहरूलाई थाहा छ, गत कात्तिक २१ देखि २२ गतेसम्म चलेको विस्तारित बैठकमा पार्टी पुनर्गठनको मुद्दा उठेको थियो। त्यसमा सुनुवाइ भएकै हो। पार्टीभित्र अहिले हामी पुनर्निर्माण होइन, निर्माणकै चरणमा छौं भन्ने साथीहरूको मत छ। पार्टी सुदृढीकरण र आवश्यक परे शुद्धीकरणको कुरामा जानुपर्छ भन्ने हाम्रो छलफलको निष्कर्ष रह्यो।
त्यसैलाई आधार बनाएर तलदेखि माथिसम्म पार्टीका रिक्त पद पूर्ति गर्नेदेखि अरू गतिविधिमा योजनाबद्ध हिसाबले काम गरिरहेका छौं।
सदस्यहरूले उठाएका कुरा शतप्रतिशत पारित हुँदैनन्। कार्यवाहक सभापतिको राजनीतिक प्रतिवेदन, महामन्त्रीको सांगठनिक प्रतिवेदन पनि सुझावसहित पारित भएका छन्। लोकतान्त्रिक राजनीतिक दलको चरित्र भनेको प्रस्तावहरू राखेर त्यसमा छलफल गर्दै अघि बढ्ने हो। त्यसमा हामी प्रतिबद्ध छौं।
कुनै साथीको प्रस्ताव हुबहु पारित भएन भने त्यसमा पनि अझ घनिभूत छलफल चलाउनुपर्ने रहेछ भन्ने हिसाबको बुझाइ हुनुपर्छ।
विगतमा प्रभावशाली पदमा रहेका, कार्यसम्पादन राम्रो भएका र पार्टी निर्माणमा भूमिका खेलेका मानिसहरू नै बाहिरिँदा क्षति होला नि?
असर गर्छ। त्यस्तो विचार व्यक्त गर्ने मानिस हामीसँग रहनुभएन भने त्यसले पार्टीमा पक्कै असर गर्छ।
हरेक सदस्यको महत्त्व हुन्छ। केन्द्रीय तह र निकायमा बसेका साथीहरू बाहिरिँदा असर गर्ने नै भयो। विचार राखेर, छलफल भएर, केन्द्रीय तहबाट त्यसलाई पन्छाइएको वा सुनुवाइ नगरेको अवस्था थियो भने पार्टीको क्षयीकरण असाध्यै धेरै हुन्थ्यो। पार्टीमा व्यापक ओरालो यात्रा सुरू हुन्थ्यो।
अहिलेका क्षयीकरणहरूलाई पार्टीले पूर्ति गर्नुपर्छ। हामी सबै मिलेर अगाडि बढ्ने र मुलुकलाई नै अगाडि बढाउने लक्ष्य लिएकाले साथीहरूले त्यसलाई बुझ्नुपर्छ। यस्तो बेला कुन विचार अघि सार्ने भन्ने बुझ्नुपर्छ।
हरेक सदस्य महत्त्वपूर्ण हुन्छ, उनीहरू नछुटून् भन्नेमा हाम्रो पाइला सचेत हुनुपर्छ।
सबैलाई समेट्नुपर्छ पनि भन्नुहुन्छ, अनि आयातीत भित्र्याउँदैनौं भन्नुहुन्छ? विरोधाभास भएन र!
त्यसो होइन। पार्टी सभापतिकै हकमा चाहिँ त्यो शब्दावली प्रयोग भएको छ। त्यसबाहेक अन्य पदमा छलफल गरेर पार्टी अगाडि जान सक्छ।
हामीले नेतृत्व तहबाट भनिरहेका छौं, सबैलाई समेटेर जान ढोका खुला भइसकेको छ। यो पार्टीको धेरै चरित्रमध्ये पार्टी सभापति रवि लामिछानेको चरित्र पनि हो। खरो बोल्ने, देश र जनताको पक्षमा उभिने, तुलनात्मक रूपमा कम सम्झौता गर्ने, देश र जनताको विपक्षमा रहेका शक्तिसँग सम्झौता नगर्ने चरित्र हो। फेरि पार्टीको पहिलो महाधिवेशन पनि भएको छैन। त्यसैले त्यो शब्द प्रयोग गरेका हौं। अरू सबै कुरामा पार्टी खुला छ।
अहिले हामी आन्दोलनरत नवयुवाहरू सबैसँग संवाद गरिरहेका छौं। पार्टी बृहत्तर बनाएर लैजाने हाम्रो उद्देश्य हो। यसै सन्दर्भमा मंसिर ४ गते बृहत्तर छलफल राखेका छौं।
अहिलेको आन्दोलनलाई बृहत्तर बनाएर लैजानुपर्ने दायित्व पूरा गर्न म अनुरोध गर्न चाहन्छौं। यसका साथै चुनावी सहकार्यको वातावरण बनाउन हामी लचिलो पनि छौं।
यो पनि पढ्नुहोस्:
***
-1763106181.jpg)
-1746009348.jpg)
