नेपाली कांग्रेसको विशेष महाधिवेशन पक्षधरले शुक्रबार काठमाडौंमा पत्रकार सम्मेलन गरी आफ्नो कुरा राखेको छ।
विशेष महाधिवेशन पक्षधरहरूले अब अरू कुनै विकल्प नरहेको पत्रकार सम्मेलन गरी बताएका छन्।
‘हामीलाई विश्वास छ- पुस २७-२८ मा विशेष महाधिवेशन गर्ने जिम्मेवारी केन्द्रले पूरा गर्नेछ,’ विशेष महाधिवेशन पक्षधरका नेता सुवास पोखरेलले विज्ञप्ति वाचन गर्दै भनेका छन्, ‘हामी स्पष्ट गर्न चाहन्छौं- यो माग कसैको जित र हारको रूपमा नलिई पार्टीको एकता कायम राख्न तथा पार्टीको आन्तरिक लोकतन्त्र जोगाउँदै जनताप्रति जबाफदेही बन्ने अवसरको रूपमा ग्रहण गरी नेपाली कांग्रेसलाई नयाँ ऊर्जा, एकता र दिशासहित अघि बढाउन पार्टी नेतृत्वसमक्ष विनम्रतापूर्वक अनुरोध पनि गर्दछौं।'
पत्रकारहरूले गरेको प्रश्नमा भने नेता देवराज चालिसेले जबाफ दिएका थिए।
उनले ४० प्रतिशत प्रतिनिधिले कारण खुलाएर विशेष महाधिवेशन माग गरेमा ९० दिनभित्र केन्द्रीय कार्यालयमा बोलाउनुपर्ने बाध्यकारी व्यवस्था भएको बताए।
'स्वेच्छिक होइन। निर्देशित छ बाध्यकारी छ। गर्नैपर्छ। पार्टीको विधानमा उल्लिखित अवस्था। जुन विधानमा व्यवस्था गरिएको छ। त्यसलाई उल्लंघन गर्ने सुविधा केन्द्रीय समितिलाई छैन,' उनले भने।
उनले पार्टी बहुमत र विधानबाट चल्ने र यी दुवै तर्फबाट आफूहरूको माग कार्यान्वयनका लागि केन्द्रीय समिति बाध्य रहेको बताए।
'बहुमत सदस्यले माग गरेको छ। विधानले व्यवस्था गरेको छ। दुवै कुराबाट उम्किने सुविधा केन्द्रीय समितिसँग छैन। त्यसकारण यो रहरको कुरा होइन। कुनै जित-हारको कुरा होइन। पार्टीको नियम विधानअनुसार गर्नुपर्ने उसको कर्तव्यभित्र पर्छ,' उनले भने, 'कर्तव्यच्यूत हुने काम पार्टीको केन्द्रीय समितिले गर्ला भन्ने लाग्दैन। पार्टी केन्द्रले विशेष अधिवेशन बोलाउनेछ भन्ने विश्वास छ।'
विशेष महाधिवेशन पार्टीको जीवनसँग जोडिएको उनले बताए।
'अहिले बदलिँदो राजनीति परिस्थिति आएको छ। यो परिस्थिति आएको छ यसले यो पार्टी सुध्रिएको, बदलिएको तस्बिर जनताको बीचमा जाँदा पार्टीप्रति जनमत पनि बढ्छ। जनताले सोचेको अनुसार पार्टी बन्दछ भनेर चुनावभन्दा अघि विशेष महाधिवेशन माग गरेका हौं,' उनले भने, 'पार्टीको नीति र नेतृत्व महाधिवेशनसँग जोडिएको हुनाले ती नभई जनतामा जाँदा पार्टीको इमेज सुध्रिएको इमेज जाँदैन भन्ने मनशायले हामीले महाधिवेशनको माग गरेका हौं।'
विशेष महाधिवेशनको प्रक्रिया अघि बढेपछि शुक्रबार अपराह्न ३ बजे केन्द्रीय कार्यसम्पादन बस्न लागेको छ।
'हामीले बुझाएको दस्तावेज पार्टीले पालन गर्नुपर्न उसको दायित्व हो। हामीलाई विश्वास छ आज बस्ने केन्द्रीय कार्यसम्पादन समितिले यो हाम्रो मागलाई स्वीकार गरेर केन्द्रीय समितिले नै यसलाई बोलाउनेछ,' उनले भने, 'बोलाएर पार्टीको एकता कायम राख्दै जनताले अपेक्षा गरेको पार्टी बनाउने प्रक्रियामा पार्टीका केन्द्रीय नेताहरू समर्पित हुनुहुनेछ। यो कर्तव्य उहाँहरूको हो। कसरी गर्ने त्यो उहाँहरूको विषय हो।'
केन्द्रीय समितिले त्यसो नगरे के हुन्छ भनेर पत्रकारहरूलाई नेता चालिसेलाई सोधे।
जबाफमा लामो समयसम्म पार्टी नेतृत्व गरेको सभापतिले आफ्नै आँखा अगाडि पार्टी क्षतविक्षत भएको कल्पना गर्न नसक्ने आफूहरूको विश्वास रहेको बताए।
'आदरणीय पार्टी सभापति जो लामो समयसम्म हाम्रो पार्टीको नेतृत्व गर्नुभो आफ्नो जीवनको उत्तरार्द्धमा आफ्नो आँखा अगाडि यो पार्टी क्षतविक्षत भएको कल्पना गर्न सक्दैनौं। त्यस्तो काम उहाँले गर्न सक्नुहोला? जुन पार्टीले त्यो उचाइमा पुर्यायो नेताको रूपमा स्थापित गर्यो। जुन पार्टीले उहाँलाई सामाजिक मर्यादा दियो। त्यही पार्टीको अन्त्य र विघटनको लागि त्यो पार्टीको केन्द्रीय नेताहरू कदम चाल्नुहोला? त्यो हामीलाई विश्वास छैन,' उनले भने।
उनले अगाडि भने, 'उहाँहरूले बोलाउनु हुँदैन भन्ने अकल्पनीय तर्क नगरौं। उहाँहरूले बोलाउनै पर्छ। कसरी बोलाउनुहुन्छ। कसरी सम्बोधन गर्नुहुन्छ। कसरी विनविन र सबैलाई एकता कायम गर्ने भन्नेतिर बहस गर्न जरूरी छ। यो पोजेटिभ तरिकाबाट तर्क र बहस आवश्यक छ।'
-1767333214.jpeg)
-1746009348.jpg)
