निर्वाचन आयोगले दलहरूले बुझाएको समानुपातिक उम्मेदवारहरूको सूची संशोधन हुन सक्ने अवस्था खुलाएको छ।
आयोगले शुक्रबार प्रेस विज्ञप्ति जारी गर्दै समानुपातिक निर्वाचन प्रणालीतर्फका बन्दसूचीमा सूचीकृत कुनै पनि उम्मेदवारले आफ्नो नाम उम्मेदवारको सूचीबाट फिर्ता लिन चाहेमा निवेदन दिनसक्ने बताएको छ।
त्यसरी उम्मेदवारले बन्दसूचीबाट नाम फिर्ता लिएको जानकारी आयोगले सम्बन्धित राजनीतिक दललाई दिने र नाम फिर्ता लिएका कारण रिक्त हुन आएमा सोही समूहको अर्को उम्मेदवारको मनोनयन गर्न सक्ने आयोगले जनाएको छ।
प्रतिनिधि सभा सदस्य समानुपातिक निर्वाचन निर्देशिका, २०८२ को दफा २० मा भएको व्यवस्था अनुसार उम्मेदवारको बन्दसूची जाँचबुझ गर्दा समानुपातिक प्रतिनिधित्व र समावेशी सिद्धान्तका आधारमा तयार भए नभएको वा रीत पुगे/नपुगेको यकिन हुने आयोगले बताएको छ। त्यस्तो रीत नपुगेको पाइएको हदसम्म आयोगले सम्बन्धित दललाई सूची सच्याउन जानकारी गराउनेछ।
गत पुस १३ र १४ गते राजनीतिक दलहरूले उम्मेदवारको बन्दसूची पेस गर्ने कार्यक्रम रहेकोमा ६४ वटा राजनीतिक दलहरूले तोकिएको अवधिभित्र बन्दसूची पेस गरेको आयोगले बताएको छ।
६४ वटा दलमध्ये ५४ वटा राजनीतिक दलले आ–आफ्नो निर्वाचन चिह्नमा र १० वटा राजनीतिक दलले चार वटा एकल चुनाव चिन्हमा निर्वाचनमा भाग लिनेगरी बन्दसूची पेस गरेका छन्।
-1746009348.jpg)
