रूपाकोट रिसोर्टका सञ्चालक पुष्पराज अधिकारीले एमाले परित्याग गरेका छन्।
२०४८ सालदेखि एमालेको पार्टी सदस्यता लिएर क्रियाशील रहेका अधिकारी शनिबार राष्ट्रिय स्वतन्त्र पार्टी (रास्वपा) प्रवेश गरेका हुन्।
उनलाई रास्वपाका उपसभापति स्वर्णीम वाग्ले, महामन्त्री कविन्द्र बुर्लाकोटी, प्रवक्ता मनीष झा लगायत नेताहरूले स्वागत गरे।
एमालेको राजनीतिमा विद्यार्थी कालदेखि लागेका अधिकारी विदेशमा छँदा पनि पार्टीमा सक्रिय थिए।
२०५२ सालदेखि लामो समय बेल्जियम बसेका अधिकारीले बेल्जियममै एमालेको प्रवास कमिटीमा तीन कार्यकाल नेतृत्व गरे। त्यति बेला प्रवास कमिटीलाई एमालेले नेपालको अञ्चल कमिटीसरह मान्यता दिएको थियो।
नेपाल फर्केर पोखराको रूपाकोट गाउँपालिकामा रूपाकोट रिसोर्ट सञ्चालन गर्न थालेपछि पनि अधिकारी एमालेको राजनीतिमा सक्रिय थिए।
एमाले गण्डकी प्रदेश कमिटीका पूर्व सदस्य रहेका अधिकारी गएका निर्वाचनहरूमा पोखरा महानगरका मेयर र प्रतिनिधि सभामा सिफारिससमेत हुँदै आएका थिए। यद्यपि, उनले टिकट पाएनन्।
रुपाकोट रिसोर्ट सञ्चालनसँगै राजनीति गरिरहेका अधिकारी अब एमालेबाट देशको आर्थिक वृद्धि हुन सक्ने स्थिति नदेखेर रास्वपा प्रवेश गरेको बताए।
'जुन स्तरमा देशले आर्थिक उन्नति गर्नुपर्थ्यो, त्यो गरेन,' उनले भने, 'एमालेले फेरि आर्थिक उन्नति गर्न सक्छ भनेर मेरो स्वविवेकले मान्दै मानेन।'
रास्वपामा प्रवेश गर्दा आफूले कुनै सर्त नराखेको भन्दै उनले राज्यका कुनै पनि तहमा पुग्ने आफ्नो चाहना नरहेको बताए।
'मैले कुनै सर्त नराखी रास्वपालाई समर्थन गरेको हुँ,' उनले भने, 'मलाई कुनै राजनीतिक पदमा जाने इच्छा पनि छैन। जाँदा पनि जाँदिनँ।'
युवा पुस्ताले नै देशको उन्नतिको नेतृत्व गर्नुपर्ने पर्यटन व्यवसायी अधिकारीले बताए।
एमाले धेरै कमजोर भइसकेको भन्दै उनले अब चुनावमा भोट माग्न जाने नैतिक आधार पनि नभएको बताए।
'एमाले धेरै कमजोर भइसकेको छ। महाधिवेशन हेर्नुहोस्, बाहिर जे भने पनि भित्र नैराश्यता छ,' उनले भने, 'एमालेमा अहिले कुनै उत्साह छैन। भोट माग्न जाने नैतिक आधार पनि छैन।'
व्यवसायी अधिकारीसहित नेपाली कांग्रेसबाट गण्डकी प्रदेशका भौतिक पूर्वाधार मन्त्री रहिसकेका नेता कुमार खड्का, कांग्रेसकै महाधिवेशन प्रतिनिधि मिलन थापा लगायत पनि शनिबार रास्वपा प्रवेश गरे।
पूर्वमन्त्री खड्का अखण्ड नेपाल पार्टी कांग्रेसमा मिसाएर गण्डकीका समानुपातिक सांसद र मन्त्री बनेका थिए। उनलाई कांग्रेसले २०७९ को निर्वाचनमा अन्तर्घात गरेको आरोपमा पार्टीबाट निस्कासन गरेको थियो।
यस्तै, रास्वपा प्रवेश गरेकी व्यवसायी मिलन थापा कांग्रेसका महाधिवेशन प्रतिनिधि हुन्।
कांग्रेसबाट गण्डकीमा सामाजिक विकास मन्त्री रहेका विन्दुकुमार थापाको बुहारी रहेकी मिलन नाडा अटोमोबाइल्स एसोसिएसनका पूर्व अध्यक्ष ध्रुव थापाकी श्रीमती हुन्।
एकै परिवारका सदस्य भएकाले मिलनको रास्वपा प्रवेशलाई लिएर भने चासो बढेको छ।
-1746009348.jpg)
