नागरिक उन्मुक्ति पार्टी रूपन्देहीका अध्यक्षसहित अधिकांश जिल्ला कमिटीका पदाधिकारी र सदस्यहरूले राजीनामा दिएका छन्।
रञ्जिता श्रेष्ठ नेतृत्वको नागरिक उन्मुक्ति पार्टीका रूपन्देही अध्यक्ष तुल्सी थारूसहित जिल्ला कमिटीका ३३ जनाले सामुहिक राजीनामा दिएर राष्ट्रिय स्वतन्त्र पार्टी (रास्वपा)मा प्रवेश गर्ने तयारी गरेको वरिष्ठ उपाध्यक्ष राकेश कोइरीले जानकारी दिए।
´जिल्लामा ५१ जनाको कार्यसमिति छ सकेसम्म सबैजनालाई लैजाने प्रयास गरिरहेका छौं,’ कोइरीले भने।
पार्टीको नेतृत्वले गरेका निर्णयहरू, कार्यशैली र संगठन सञ्चालनको प्रक्रियामा असहमति जनाउँदै आफूहरूले अध्यक्ष रन्जिता श्रेष्ठ र रेशम चौधरी दुबैजनासँग सल्लाह नगरी पार्टी परित्याग गरेको उनले बताए।
´भोलि काठमाडौंमा रास्वपाको कार्यक्रम छ त्यही कार्यक्रममा प्रवेश गर्ने गरी आज साँझ काठमाडौं जादै छौं,’ कोइरीले भने।
उनले लुम्बिनी प्रदेशका अन्य जिल्लाहरूबाट पनि नाउपा छोडेर रास्वपा प्रवेश गर्ने क्रम चलिरहेको उल्लेख गर्दै प्रदेशमा नाउपालाई निल बनाउने गरी योजना बनाइरहेको बताए।
कोइरीका अनुसार राजीनामा दिनेहरूमा जिल्ला अध्यक्ष थारूसहित वरिष्ठ जिल्ला उपाध्यक्ष राकेश कोइरी, केन्द्रीय सदस्य महेश गिरी, तारादेवी चौधरी, मञ्जु दगोरिया, केशव चौधरी, प्रदेश सदस्य माधव चौधरी, जिल्ला कोषाध्यक्ष राम बहादुर थारू, महिला जिल्ला अध्यक्ष राधा चौधरी लगायत छन्।
-1746009348.jpg)
