नेकपा एमालेका निर्वाचन क्षेत्र कमिटीले माथिल्लो कमिटीमा उम्मेदवार सिफारिस गर्न थालेका छन्।
फागुन २१ गते हुने प्रतिनिधि सभा निर्वाचनका लागि एमालेबाट २२ जनाभन्दा बढी उम्मेदवार एकल रूपमा सिफारिस भएर आएका छन्।
एक महिलासहित तीन उम्मेदवार सिफारिस गरेर माथिल्लो कमिटीमा पठाउन निर्देशन दिएका केही निर्वाचन क्षेत्रले एकल उम्मेदवार पठाएका हुन्।
ती नाम जिल्ला, प्रदेश हुँदै केन्द्रमा आउने छन्। अन्तिममा पार्टी सचिवालय बैठकले अनुमोदन गर्नेछ। फागुन २१ गते हुने निर्वाचनका लागि माघ ६ गते उम्मेदवारी दर्ताको कार्यतालिका छ।
एमालेले दिएको जानकारी अनुसार सुदूरपश्चिमका तीन स्थानमा सर्वसम्मत उम्मेदवार सिफारिस भएका छन्।
जसमा बैतडीबाट पूर्वमन्त्री, सांसद दामोदर भण्डारी सिफारिस भएका छन्। दार्चुलाबाट गणेश ठगुन्ना एकल सिफारिस भएका छन्। कैलाली–४ बाट केन्द्रीय उपमहासचिव लेखराज भट्ट एकल सिफारिस भएर आएका छन्।
कर्णालीतर्फ सुर्खेत–१ बाट ध्रुव शाही, सुर्खेत–२ बाट कुलमणि देवकोटा एकल उम्मेदवार सिफारिस भएका छन्। सल्यानबाट गुलाबजंग थापाको नाम एकल सिफारिस भएको छ।
लुम्बिनीअन्तर्गत् बाँके–१ बाट सूर्य ढकाल सिफारिस भएका छन्। उनी यसअघि पनि सांसद थिए। बाँके–३ बाट दलबहादुर सुनार, कपिलवस्तु–१ बाट विश्राम चौधरी एकल सिफारिस भएका छन्।
दाङ–२ बाट महासचिव शंकर पोखरेल, रूपन्देही–२ बाट उपाध्यक्ष विष्णु पौडेल, गुल्मी–१ बाट पूर्व उपमहासचिव प्रदीप ज्ञवाली र रूपन्देही–५ बाट खिमलाल भट्टराई एकल सिफारिस भएका छन्। रूपन्देही–५ बाट यसअघि बासुदेव घिमिरे निर्वाचित भएका थिए।
गण्डकी प्रदेश अन्तर्गत नवलपुर–२ बाट तिलक महत र गोरखा–२ बाट मिलन गुरूङ एकल सिफारिस भएका छन्।
बागमतीअन्तर्गत् नुवाकोट–१ मा बद्रि मैनाली र २ मा केशव पाण्डे एकल सिफारिस भएका छन्। काठमाडौं–२ मा मणिराम फुयाल प्रस्तावित भएका छन्। उनी एकल सिफारिस हुने सम्भावना छ।
मधेसअन्तर्गत् रौतहट–१ बाट अजय गुप्ता, सिराहा–३ बाट लीलानाथ श्रेष्ठ, महोत्तरी–१ बाट लक्ष्मी महतो कोइरी एकल सिफारि भएका छन्।
कोशी प्रदेशबाट झापा–५ मा अध्यक्ष केपी शर्मा ओली र इलाम–२ बाट सुहाङ नेम्वाङ एकल सिफारिस भएका छन्।
-1746009348.jpg)
