धनुषा क्षेत्र नं १ मा रास्वपाका उम्मेदवार किशोरी साह कमलको उम्मेदवारी खारेज भए पनि उनले पाएको मत धेरै देखिएको छ।
तर रास्वपाका उम्मेदवार कमलको उम्मेदवारी खारेज भएकाले मत भने सार्वजनिक गरिएको छैन।
अहिलेसम्म आएको मत परिणाम अनुसार नेपाली कम्युनिष्ट पार्टीका उम्मेदवार मातृका यादवले अग्रता लिएका छन्। यादवले ६ हजार ९६८ मत ल्याएका छन्। कांग्रेसका राम पलटन साहले ६ हजार ७८३ मत ल्याएका छन्।
तेस्रोमा रहेका एमालेका रामचन्द्र मण्डलको ६ हजार ३२९ मत छ।
मतगणना धेरै अघि बढेको भए पनि निर्वाचन आयोगको वेबसाइटमा अपडेट गरिएको छैन।
आयोगले रास्वपालाई परेको मत पनि गणना गर्न भनेको स्रोतले बतायो। यद्यपि सार्वजनिक भने नगर्न भनेको छ।
रास्वपा उम्मेदवार कमल आफ्नो उम्मेदवारी खाेरजीविरूद्ध सर्वोच्च गएका छन्। सर्वोच्च अदालत गएकाले भोलिको दिनमा आउन सक्ने सम्भावित निर्णयलाई समेत ख्याल गरिएको छ।
यसको पेसी सोमबारका लागि तोकिएको छ।
‘यदी सर्वोच्च अदालतले आयोगको निर्णयलाई बदर गरिदियो भने त्यो मतका आधारमा विजयी घोषणा गर्न मिल्छ भनेर यस्तो भनिएको हुन सक्छ,’ स्रोतले भन्यो, ‘हामीसँग सदर मत र बदर मत मात्र राख्न मिल्ने सफ्टवेयर भएकाले मत परिणाम अपलोड गर्न समस्या भएको हो। तर रास्वपा बाहेक अरू पार्टीले पाएको मतलाई भने हामीले सार्वजनिक गरिरहेका छौं।’
स्रोतका अनुसार रास्वपाले पाएको मतको संख्या निकै धेरै छ।
‘अहिले पहिलोका लागि तीन जनाको प्रतिस्पर्धा जस्तो देखिएको छ। तर रास्वपाको उम्मेदवारी खारेज नभएको भए यो प्रतिस्पर्धा दोस्रोको लागि हुने रहेछ। रास्वपाको मत कति छ भनेर एजेन्टहरू सबैलाई थाहा छ,’ स्रोतले भन्यो, ‘रास्वपाका समर्थकहरूले पार्टीले पाएको मत सार्वजनिक गर्न माग गरिरहेका छन्। तर कानुनी प्रावधान अनुसार हामीले यो मत सार्वजनिक गर्न मिल्दैन। सर्वोच्च अदालतले आयोगको निर्णय उल्ट्याइदियो भने जित रास्वपाकै हुन्छ।’
रास्वपा उम्मेदवार साहको पेशीको लागि फागुन २५ गते बोलाएकाले त्यो बेलासम्मको लागि मतगणना नगर्न समेत रास्वपा समर्थकहरूले माग गरिरहेका छन्। यता आयोगले भने मतगणना गर्न तर रास्वपाको मत सार्वजनिक नगर्न भनेको छ। रास्वपाको मतलाई बदर मतमा नराख्न समेत आयोगले निर्देशन दिएको छ।
यो पनि: धनुषा-१ मा रास्वपाका किशोरी साहको उम्मेदवारी किन भयो खारेज?
-1746009348.jpg)
