राष्ट्रिय स्वतन्त्र पार्टी (रास्वपा) सभापति रवि लामिछानेले भारतीय प्रधानमन्त्री नरेन्द्र मोदीलाई धन्यवाद दिँदै भारतसँगको साझेदारीलाई नयाँ उचाइमा पुर्याउने अपेक्षा रहेको बताएका छन्।
सोमबार मोदीले सामाजिक सञ्जालमा लेखेको पोस्टमा जबाफ लेख्दै रविले यस्तो बताएका हुन्।
मोदीले रवि लामिछाने र रास्वपाका वरिष्ठ नेता बालेन्द्र शाहसँग टेलिफोन वार्ता गरेको र उनीहरूको जित र रास्वपाले हासिल गरेको सफलताका निम्ति बधाइ दिएको बताएका थिए।
सोही पोस्टमा जबाफ फर्काउँदै सभापति रविले लेखेका छन्, 'प्रधानमन्त्री नरेन्द्र मोदी ज्यू, तपाईंको शुभकामना र नेपाली जनताको लोकतान्त्रिक जनादेशलाई सम्मानपूर्वक स्वीकार गर्नुभएकोमा धन्यवाद। रास्वपा र हाम्रो सरकार आपसी सम्मान र साझा समृद्धिमा आधारित सम्बन्ध सुदृढ बनाउन प्रतिबद्ध रहनेछ। यसका लागि रास्वपाले विकास कूटनीतिलाई प्राथमिकता दिनेछ।'
उनले सहकार्य अझ सुदृढ गर्दै भारतसँगको साझेदारीलाई नयाँ उचाइमा पुर्याउने अपेक्षा राखेको पनि बताएका छन्।
'सडक तथा अन्य पूर्वाधारमार्फत सम्पर्क विस्तार, सांस्कृतिक पर्यटन, ऊर्जा तथा व्यापारका क्षेत्रमा दुई देशको सहकार्यलाई अझ सुदृढ गर्दै भारतसँगको साझेदारीलाई नयाँ उचाइमा पुर्याउने अपेक्षा छ जसले दुवै देशका जनताको समृद्ध भविष्य सुनिश्चित गर्नेछ,' उनले लेखेका छन्।
मोदीले भने रवि र बालेनसँग 'न्यानो' वार्ता भएको भन्दै आगामी नयाँ सरकार गठनका लागि आफूले शुभकामना दिएको बताएका छन्।
दुवै देशको आपसी समृद्धि, प्रगति र कल्याणका लागि भारत उनीहरूसँग सहकार्य गर्न प्रतिबद्ध रहेको सन्देश आफूले दिएको पनि मोदीले बताएका छन्।
'हाम्रो संयुक्त प्रयासमार्फत आगामी वर्षहरूमा भारत–नेपाल सम्बन्ध नयाँ उचाइमा पुग्नेछ भन्नेमा म विश्वस्त छु,' उनले भनेका छन्।
-1746009348.jpg)
