अमेरिकाले इरानविरुद्ध सुरु गरेको युद्धको पहिलो छ दिनमै ११ अर्ब ३० करोड डलरभन्दा बढी खर्च भएको खुलेको छ।
अमेरिकी रक्षा मन्त्रालय (पेन्टागन)का अधिकारीहरूले अमेरिकी सांसदहरूलाई मंगलबार क्यापिटल हिलमा गरेको गोप्य ब्रिफिङमो सो खर्च अनुमान प्रस्तुत भएको अन्तर्राष्ट्रिय सञ्चारमाध्यमहरूले जनाएका छन्।
इरानमाथि अमेरिका र इसराइलले डिसेम्बरको अन्तिम दिन हमला गरेका थिए। त्यसयता अमेरिकाले लगातार इसराइलसँग मिलेर संयुक्त हमला गरिरहेको छ।
क्यापिटल हिलमा भएको ब्रिफिङबारे जानकार राख्ने अधिकारीका अनुसार वास्तविक खर्च पेन्टागनका अधिकारीहरूले प्रस्तुत गरेकोभन्दा धेरै बढी हुन सक्ने भनिएको छ।
किनभने मंगलबार प्रस्तुत गरिएको खर्च विवरणमा आक्रमणअघि गरिएको सैनिक उपकरण र जनशक्ति तैनाथी, सैन्य तयारी तथा अन्य धेरै खर्च समावेश गरिएको छैन भनेर अधिकारीहरूलाई उद्धृत गरेर अमेरिकी अखबार न्युयोर्क टाइम्सले लेखेको छ।
त्यसैले पेन्टागनले थप गणना गर्दै जाँदा वास्तविक खर्च अझ धेरै बढ्ने अपेक्षा गरिएको छ।
अमेरिकी रक्षा अधिकारीहरूले यसअघि पनि कांग्रेसका केही बैठकहरूमा युद्धको सुरुवाती दुई दिनमै करिब ५ अर्ब ६० करोड डलर बराबरको हतियार तथा गोला–बारुद प्रयोग भएको बताएका थिए। यो सार्वजनिक रूपमा यसअघि बताइएका अनुमानभन्दा धेरै ठूलो खर्च मानिएको छ।
विश्लेषकहरू युद्धको पहिलो १०० घण्टामै करिब ३ अर्ब ७० करोड डलर खर्च भएको थियो, जसको दैनिक औसत करिब ८९ करोड डलर पर्छ।
प्रारम्भिक आक्रमणमा एजीएम–१५४ ग्लाइड बमजस्ता महँगा हतियार प्रयोग गरिएको थियो। यसको मूल्य प्रति बम करिब ५ लाख ७८ हजारदेखि ८ लाख ३६ हजार डलरसम्म पर्ने अन्तर्राष्ट्रिय समाचार संस्था रोयटर्सले लेखेको छ।
युद्धका क्रममा प्रयोग गरिने खर्च घटाउन अमेरिकी सेनाले तुलनात्मक रूपमा सस्ता हतियारहरू प्रयोग गर्ने योजना सेनाले बनाएको पनि अधिकारीहरूले जनाएका छन्।
त्यसअनुसार ‘ज्वाइन्ट डायरेक्ट अट्याक म्युनिसन’को प्रयोग बढाउने योजना छ। यसको सानो वारहेडको मूल्य करिब १ हजार डलर हुन्छ भने मार्गदर्शन किट करिब ३८ हजार डलर पर्छ।
युद्धको खर्च तीव्र रूपमा बढ्दै जाँदा अमेरिकी संसदमा थप बजेट आवश्यक पर्ने विषयमा बहस सुरु भएको छ।
केही अधिकारीहरूले ह्वाइट हाउसले चाँडै युद्धका लागि थप बजेट माग्ने सम्भावना रहेको बताएका छन्। माग हुने रकम करिब ५० अर्ब डलरसम्म हुन सक्ने अनुमान गरिएको छ।
यद्यपि रिपब्लिकन र डेमोक्र्याट दुवै दलका केही सांसदहरूले युद्धको उद्देश्य, अवधि र अन्त्य कहिले हुन्छ भन्नेबारे स्पष्ट जानकारी नदिइएसम्म थप बजेट स्वीकृत गर्न हिच्किचाहट देखाएका छन्।
अमेरिकी राष्ट्रपति डोनाल्ड ट्रम्पले युद्धमा अमेरिकाले जितिसकेको दाबी गरेका छन्। तर उनले इरानसँगको लडाइँ पूर्ण रूपमा समाप्त नभएसम्म अमेरिकी सेना अभियानमै रहने बताएका छन्।
फेब्रुअरी २८ मा अमेरिका र इसराइलले संयुक्त रूपमा इरानमाथि हवाई आक्रमण सुरु गरेपछि युद्ध फैलिएको हो।
त्यसयता झण्डै दुई हजार मानिसको मृत्यु भएको अन्तर्राष्ट्रिय सञ्चारमाध्यमहरूले जनाएका छन्। मारिनेहरुमा अधिकांश इरान र लेबननका नागरिक छन्।
इरानकै सर्वोच्च नेता आयातोल्लाह अली खामेनीसहित उच्चपदस्थ मारिएका छन्।
इरानले मध्यपूर्वमा रहेका अमेरिकी आधारशिविरलाई निशाना बनाउँदा क्षेत्रीय स्तरमै युद्ध फैलिएको छ।
युद्धका कारण विश्व ऊर्जा बजार र अन्तर्राष्ट्रिय यातायात प्रणालीसमेत प्रभावित भएको छ।
-1746009348.jpg)
