नयाँ सरकारबारे के भन्छन् सहिद परिवार?
जेनजी आन्दोलनको बलमा भएको प्रतिनिधिसभा निर्वाचनले बालेन शाहको नेतृत्वमा सरकार बनाउन राष्ट्रिय स्वतन्त्र पार्टी (रास्वपा) लाई स्पष्ट 'म्यान्डेट' दिएको छ। यो सरकारबाट सारा देशले परिवर्तनको अपेक्षा गरेको छ। सबभन्दा बढी अपेक्षा ती परिवारको छ, जसका छोराछोरी जेनजी आन्दोलनमा सहिद भए।
यसै सन्दर्भमा हामीले जेनजी आन्दोलनका सहिद परिवारसँग निर्वाचन परिणामबारे उनीहरूको धारणा के छ र नयाँ बन्ने सरकारप्रति उनीहरूले के आशा लिएका छन् भनेर सोधेका छौं।
***
रचना खतिवडालाई भदौ २३ सम्झिँदा पनि मन चिसो हुन्छ। तर जति बिर्सिन्छु भन्दा पनि त्यो दिनको सम्झनाले घरि घरि उनको मन बिथोल्न आइरहन्छ।
त्यस दिन रचनाले आफ्नो एक्लो छोरा गुमाएकी थिइन्। उनका २२ वर्षीय छोरा रसिक खतिवडा प्रहरीको गोली लागेर सहिद भएका थिए।
छोराको मृत्यु भएदेखि नै गोली चलाउने र गोली चलाउन आदेश दिनेहरूलाई कारबाहीको माग लिएर विभिन्न निकाय धाइरहेकी रचनाले बालेन सरकारबाट त्यो माग पूरा हुने आशा लिएकी छन्।
'जेनजी आन्दोलनपछि सुशीला कार्कीको नेतृत्वमा बनेको अन्तरिम सरकारसँग मैले पटक पटक न्यायको निम्ति आग्रह गरेँ। कयौं पटक सिंहदरबार पुगेँ। धर्ना बसेँ। तर मेरो माग सुनुवाइ भएन,' उनले भनिन्, 'मेरो एक मात्र आशा बालेन शाहमाथि थियो। उहाँले नै सहिद परिवारलाई न्याय दिलाउन सक्नुहुन्छ भनेर मैले यसपालि छोराको अनुहार सम्झेर रूँदै रूँदै घन्टीमा भोट हालेको छु, बालेन सरकारले मेरो आशा खेर जान दिनुहुने छैन भन्ने विश्वास छ।'
रचनाले आफ्नो छोरा लगायत जेनजी आन्दोलनका सहिद र घाइतेहरूलाई न्याय दिन राजनीतिमा पनि कदम बढाएकी छन्।
राष्ट्रिय स्वतन्त्र पार्टी (रास्वपा) ले उनको नाम समानुपातिक सूचीमा राखेको छ। खसआर्य क्लस्टरतर्फ दोस्रो नम्बरमा उनको नाम छ।
'म सांसद हुन्छु कि हुँदिन थाहा छैन। तर भए पनि, नभए पनि सहिद परिवारलाई न्याय दिलाउने अभियान छाड्दिनँ,' उनले भनिन्, 'अब बन्ने बालेन सरकारबाट मेरो पहिलो आशा यसैमा छ।'
उनले अगाडि भनिन्, 'उहाँले जेनजी आन्दोलनको भावना अनुसार काम गर्ने बाचा गर्नुभएको छ। त्यो बाचा पूरा गर्ने पहिलो सर्त भनेकै सहिदहरूलाई न्याय दिने हो। उहाँहरूलाई त्यसैका लागि जनताले सरकारमा पुर्याएका हुन्।'
अब बन्ने सरकारले पनि सहिद परिवारको माग पूरा गरेन भने सडक र सदनबाट व्यापक आवाज उठ्ने उनी बताउँछिन्। आफू पनि सदन वा सडकमा बसेर न्यायका लागि पहल गरिरहने उनको भनाइ छ।
'सहिद परिवारको माग भनेको क्षतिपूर्ति होइन। त्योभन्दा ठूलो कुरा कलिला बालकहरूमाथि गोली चलाउनेहरूविरूद्ध कारबाही हो। जबसम्म कारबाही हुँदैन, सहिदको आत्माले शान्ति पाउँदैन,' रचनाले भनिन्।
'यो सरकारले पनि सहिद परिवारलाई न्याय दिएन भने म अहिले ४६ वर्षकी भएँ, बाँचुञ्जेल लड्नेछु,' उनले भनिन्।
यी पनि पढ्नुहोस्:
-1746009348.jpg)
