जेनजी आन्दोलनको बलमा भएको प्रतिनिधिसभा निर्वाचनले बालेन शाहको नेतृत्वमा सरकार बनाउन राष्ट्रिय स्वतन्त्र पार्टी (रास्वपा) लाई स्पष्ट 'म्यान्डेट' दिएको छ। समानुपातिक मतसमेत जोड्दा रास्वपाले दुईतिहाइ बहुमत ल्याउने देखिएको छ।
रास्वपाको पक्षमा यस्तो अभूतपूर्व जनलहर देखिनुको एउटा कारण भदौ २३ र २४ को जेनजी आन्दोलन हो।
पुराना राजनीतिक दलहरूप्रति वितृष्णा र मुलुकमा व्याप्त भ्रष्टाचार र कुशासनविरूद्ध उर्लिएको नवयुवाहरूको उक्त आन्दोलनले सत्ता मात्र पल्टाएन, परिवर्तनको पक्षमा देशव्यापी लहर पैदा गर्यो। त्यही लहरको जगमा टेकेर अघिल्लो संसदमा चौथो दल रहेको रास्वपा बहुमतसहित सत्तामा जाँदैछ।
यो सरकारबाट सारा देशले परिवर्तनको अपेक्षा गरेको छ। सबभन्दा बढी अपेक्षा त ती परिवारको छ, जसका छोराछोरी जेनजी आन्दोलनमा सहिद भए।
यसै सन्दर्भमा हामीले जेनजी आन्दोलनका सहिद परिवारसँग निर्वाचन परिणामबारे उनीहरूको धारणा के छ र नयाँ बन्ने सरकारप्रति उनीहरूले के आशा लिएका छन् भनेर सोधेका छौं।
आज पहिलो अंकमा हामीले भदौ २३ गते नयाँबानेश्वरमा ज्यान गुमाएका २३ वर्षीय सुलभराज श्रेष्ठका बुबा नरेन्द्र श्रेष्ठसँग कुरा गरेका छौं।
उनका अनुसार सुलभ बालेनलाई आफ्नो 'आइडल' मान्थे। बालेन नेतृत्वमा आए देशमा परिवर्तन ल्याउन सक्छन् भन्ने सुलभको विश्वास थियो।
बालेनजस्तै सुलभ पनि इन्जिनियर थिए। काठमाडौं इन्जिनियरिङ कलेजबाट सिभिल इन्जिनियरिङ पास गरेका सुलभले काठमाडौं महानगरपालिकाको मेयरका रूपमा पनि बालेनबाट निकै ठूलो आशा संगालेको नरेन्द्र बताउँछन्।
'इन्जिनियर पढेको मान्छे हो, अवसर पायो भने देश बनाउँछ,' छोराको भनाइ उद्धृत गर्दै नरेन्द्रले भने, 'मेरो छोराजस्तै थुप्रै नवयुवाहरूले गोली खाएर भए पनि बालेनलाई प्रधानमन्त्री बनाएरै छाडे।'
यति हुँदाहुँदै नरेन्द्रलाई अब बन्ने नयाँ सरकारप्रति खासै धेरै चासो भने छैन।
भर्खर चुनाव जितेर आएका नयाँ अनुहारहरूले जेनजी आन्दोलनमा ज्यान गुमाएका परिवारलाई प्राथमिकतामा राखेर काम गर्छन् र राहत दिन्छन् भन्ने आस नभएको उनी बताउँछन्।
बालेनले जेनजी आन्दोलनका घाइते र सहिद परिवारलाई अहिलेसम्म सहानुभूति समेत देखाउन नआएको उनले गुनासो गरे।
'उनको एक स्ट्याटसको भरमा युवाहरू सडकमा आए, उनलाई आइडल माने। तर तिनै युवा घाइते हुँदा, गोली खाँदा परिवारलाई भेटेर सहानुभूतिसम्म देखाएनन्। एकपल्ट फोन गरेर हालखबर पनि सोधेनन्,' नरेन्द्रले भने।
उनले भदौ २२ गते जेनजी आन्दोलनको तयारी क्रममा सुलभले रातभरि बसेर भ्रष्टाचारविरूद्ध ब्यानर बनाएको सम्झना पनि गरे।
देशमा सुशासन ल्याउन युवाहरू बोल्नुपर्छ भन्दै आन्दोलनमा गएका छोरा फर्केर नआएको उल्लेख गर्दै उनले भने, 'युवाहरूले दिएको आहुती यसै खेर नजाओस्। उनीहरूले चाहेजस्तो भ्रष्टाचारमुक्त देश बनाउन नयाँ सरकार सफल होस्। उनीहरूलाई सत्तामा पुर्याउन छातीमा गोली खानेहरूलाई अब बन्ने सरकारले नबिर्सियो। जसको रगतमाथि टेकेर उनीहरू उभिएका छन्, उनीहरूका लागि के गर्छन्, त्यो हेर्न बाँकी छ।'
जेनजी आन्दोलन क्रममा गोली हान्न आदेश दिने र गोली चलाउनेहरूलाई कानुनी कारबाही हुनुपर्छ भन्ने पनि उनको माग छ।
'ती व्यक्तिहरूमाथि कारबाही भयो भने मात्र सहिदको परिवारले न्याय पाउँछन्,' उनले भने, 'जबसम्म सहिद परिवारलाई न्याय दिइँदैनन्, तबसम्म केही आस छैन।'
छोराछोरी गुमाउँदाको पीडा नेताहरूले बुझ्न नसकेको पनि उनले बताए।
'तपाईंको छोरा सहिद भएका छन्, गर्व गर्नुस् भन्दै आउँछन्। त्यस्तै गर्व गर्ने कुरा हो भने तपाईंको छोरा पनि सहिद होस्, प्रत्येक घरबाट एक जना सहिद हुनुपर्यो भन्न मन लाग्छ,' उनले भने, 'हाम्रो एकल सन्तान गुमेको छ। सहारा खोसिएको छ। यस्तोमा कसरी गर्व गर्न सकिन्छ?'
उनले अगाडि भने, 'जुन परिवारका लागि उसको छोराछोरी नै संसार थियो, उही नरहँदा ती आमाबुबाको हालत कस्तो हुन्छ कसैले सोच्न सक्दैन। हामीलाई अहिलेसम्म सरकारले केही गरिदिए जस्तो लागेको पनि छैन। १५ लाख रूपैयाँ दिएर राहत हुँदैन, पैसा दिँदैमा राहत हुन्छ भन्ने पनि छैन।'
***
-1746009348.jpg)
