नेपाली कांग्रेसका नेता पूर्णबहादुर खड्काले कार्यवाहक सभापतिको हैसियतमा विज्ञप्ति निकालेको विषयमा पार्टीभित्र छलफल भएको छ।
कांग्रेसका पदाधिकारीहरूबीचको शनिबारको अनौपचारिक छलफलमा यस विषयमा कुरा उठेको हो।
पूर्वप्रधानमन्त्री तथा नेकपा एमालेका अध्यक्ष केपी शर्मा ओली र पूर्वगृहमन्त्री कांग्रेस नेता रमेश लेखकलाई पक्राउ गरिएको विषयमा शनिबार कांग्रेसका प्रवक्ता देवराज चालिसे र नेता पूर्णबहादुर खड्काले बेग्लाबेग्लै विज्ञप्ति जारी गरेका थिए।
जेनजी आन्दोलन हुँदा ओली प्रधानमन्त्री र लेखक गृहमन्त्री थिए। गौरीबहादुर कार्की नेतृत्वको जाँचबुझ आयोगको प्रतिवेदन कार्यान्वयन गर्ने निर्णय गर्दै बालेन शाह नेतृत्वको सरकारले उक्त प्रतिवेदनमा कारबाही सिफारिस भएका ओली र लेखकलाई नियन्त्रणमा लिएको थियो।
यो विषयमा कांग्रेसको संस्थापन र संस्थापनइतर पक्षले बेग्लाबेग्लै विज्ञप्ति निकालेको थियो।
संस्थापनइतर समूहका नेताहरूबीच शनिबार दिउँसो छलफल गरेर कार्यवाहक सभापतिका रूपमा पूर्णबहादुर खड्काले विज्ञप्ति जारी गरेपछि कांग्रेसभित्र यसबारे छलफल भएको हो।
पार्टी पदाधिकारीको अनौपचारिक छलफलमा 'हुँदै नभएको कार्यवाहकको हैसियत'मा खड्काले विज्ञप्ति निकालेको भन्दै केही पदाधिकारीहरूले सभापति गगन थापा र उपसभापतिद्वय विश्वप्रकाश शर्मा तथा पुष्पा भुसालको ध्यानाकर्षण गराएका थिए।
‘२०७८ मा भएको १४ औं महाधिवेशनबाट निर्वाचित तत्कालीन महामन्त्रीहरू गगन थापा र विश्वप्रकाश शर्मा तथा तत्कालीन सहमहामन्त्री सहमहामन्त्री फरमुल्लाह मन्सुरलाई खड्का कार्यवाहक हुँदा एक निर्णयको भरमा पार्टीबाट निकाल्ने निर्णय भएको सन्दर्भ निकाल्दै केही पदाधिकारीहरूले अहिले हुँदै नभएको र कसैलाई कार्यवाहक नै नदिएको अवस्थामा कार्यवाहक सभापति भन्दै पूर्णबहादुर खड्काले विज्ञप्ति निकाल्नुभएको छ, उहाँलाई कारबाही किन नगर्ने? गरौं,’ केही पदाधिकारीले राखेको प्रस्तावबारे जानकारी दिँदै कांग्रेसका एक पदाधिकारीले सेतोपाटीसँग भने।
तत्कालीन महामन्त्रीद्वय थापा र शर्माको सहभागितामा गत पुसमा विशेष महाधिवेशन भएको थियो। विशेष महाधिवेशनमा निर्वाचन प्रक्रिया अघि बढेपछि विशेष महाधिवेशनमा सहभागी नभएका शेरबहादुर देउवा पक्षले थापा र शर्मा तथा मन्सुरमाथि कारबाही गर्ने निर्णय गरेको थियो।
विशेष महाधिवेशनबाट गगन थापा नेतृत्वमा नयाँ कार्यसमिति आएको थियो। उक्त कार्यसमितिलाई निर्वाचन आयोगले मान्यता दिएको विरोधमा देउवा पक्ष सर्वोच्च अदालत गएकोमा मुद्दा विचाराधीन छ।
फागुन २१ को प्रतिनिधि सभा निर्वाचनमा समानुपातिकतर्फ तत्कालीन सभापति शेरबहादुर देउवा र प्रत्यक्षतर्फ सभापति गगन थापाको हस्ताक्षरमा सूची तयार तथा उम्मेदवारलाई टिकट दिइएको थियो।
अहिले १५ औं महाधिवेशन कार्यतालिकासमेत केन्द्रीय समितिले ल्याइसकेको छ। तर कांग्रेसभित्र संस्थापन र संस्थापनइतर समूह बनेर समानान्तर गतिविधि बढ्ने देखिएको छ।
पार्टीभित्र समानान्तर गतिविधि बढ्न सक्ने देखेपछि कांग्रेस संस्थापनले यी विषयलाई 'नोटिस' मा राखेको छ।
अब पूर्णबहादुर खड्काले कार्यवाहक सभापतिकै हैसियत भन्दै विज्ञप्ति जारी गरे उनीमाथि कारबाही गर्ने तयारीसमेत रहेको एक पदाधिकारी बताउँछन्।
‘हुँदै नभएको कार्यवाहक लेख्ने नेतालाई कारबाही गर्नुपर्छ भन्ने केही पदाधिकारीको कुरा छ। तर सभापति थापा र उपसभापतिहरू अहिले नै कारबाही गर्ने पक्षमा देखिनुभएन, यो विषयलाई नोटिसमा लिइएको छ भन्ने कुरा चाहिँ भयो,’ ती पदाधिकारीले भने, ‘अब फेरि कार्यवाहक सभापति भन्दै विज्ञप्ति निकाल्दै गए सदस्यता नवीकरण नगर्नेसम्म पुग्ने तयारी छ।’
कांग्रेसले क्रियाशील सदस्यता वितरण र नवीकरण अभियान सञ्चालन गर्न लागेको छ।
खड्काले कार्यवाहक सभापति भन्दै गतिविधि तथा विज्ञप्ति जारी गरिराखे उनको सदस्यता नवीकरण नगर्न उनको सदस्यता रहेको सुर्खेतस्थित वडा कार्यसमितिलाई केन्द्रले निर्देशन दिने पनि ती पदाधिकारी बताउँछन्।
‘उहाँले कार्यवाहक सभापति भनेर विज्ञप्ति जारी गरिराखेको खण्डमा क्रियाशील सदस्यता नवीकरण नगर्न सुर्खेतस्थित सम्बन्धित वडा कार्यसमितिलाई निर्देशन पठाइन्छ, त्यहाँबाट अवज्ञा गरेर क्रियाशील नवीकरण गरे केन्द्रले हस्तक्षेप गरेर नवीकरण होल्डमा राखिदिन्छ, समानान्तर गतिविधि गरे क्रियाशील सदस्यता नै नवीकरण रोकिन्छ,’ ती पदाधिकारीले भने।
खड्कानिकट संस्थापनइतर पक्षका एक नेताले भने कांग्रेस आधिकारिकताको विषय सर्वोच्च अदालतमा विचाराधीन रहेकोले को आधिकारिक कांग्रेस हो अहिले यकिन भइनसकेको बताए।
‘अदालतबाट यो विषय नटुंगिँदासम्म त पूर्णबहादुर खड्का नै कार्यवाहक सभापति हो, केन्द्रीय समितिले थपेको १४ औं महाधिवेशनको कार्यसमितिको कार्यकाल पनि सकिएको छैन नि!,’ ती नेताले भने, ‘विशेष महाधिवेशन भन्दै एकलौटी भेलाबाट आएको भन्नेहरूले अदालतको निर्णय कुर्न सक्नुपर्यो।’
अदालतबाट मुद्दा टुंगो नलागेसम्म नियमित १५ औं महाधिवेशनमा सहभागी हुन नसकिने देउवा पक्षका नेताहरूले बताउँदै आएका छन्।
कांग्रेसका निवर्तमान प्रमुख सचेतक श्यामकुमार घिमिरेले नेता खड्काले विज्ञप्ति निकालेकोबारे आफूले शनिबार बेलुकी मात्रै थाहा पाएको बताए।
‘नेताहरूबीच छलफल गरेर विज्ञप्ति आएको भन्ने सुनेँ, बेलुकीपख विज्ञप्ति देखेको थिएँ, म त त्यो छलफलमा सहभागी थिइनँ, को को सहभागी थिए पनि मलाई थाहा छैन,’ उनले भने।
-1746009348.jpg)
