हंगेरीमा प्रधानमन्त्री भिक्टर अर्बानको १६ वर्षदेखिको शासन अन्त्य भएको छ।
आइतबार सम्पन्न आमनिर्वाचन अन्तर्गत सोमबार बिहानसम्म ९३ प्रतिशत मतगणना हुँदा अर्बानको दक्षिणपन्थी रूढिवादी फिदेज पार्टीको पराजय निश्चित भएको हो।
त्यहाँ पिटर मग्यर नेतृत्वको टिस्जा पार्टी सत्तामा पुग्ने निश्चित भएको अन्तर्राष्ट्रिय समाचार संस्था एशोसिएटेड प्रेस (एपी)ले जनाएको छ।
मतगणना अन्तिम चरणमा पुग्दा अर्बानको पार्टीले ३७ प्रतिशत मत मात्रै प्राप्त गरेको छ भने मग्यरको पार्टीले ५३ प्रतिशत मत प्राप्त गरी सत्तामा पुग्ने निश्चित भइसकेको छ।
राष्ट्रवादी मानिने अर्बान कडा नीतिका कारण आलोचित थिए। उनले मग्यारलाई बधाई दिँदै पराजयलाई पीडादायी भनेका छन्। उनी अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिन दुवैसँग निकट थिए। मतदानको केही दिन अघि मात्रै अमेरिकी उपराष्ट्रपति जेडी भान्स हंगेरी पुगेर अर्बानको समर्थनमा सक्रिय भएका थिए।
निर्वाचनमा विजयी भएका मग्यारले भ्रष्टाचार नियन्त्रण, स्वास्थ्य सेवा र सार्वजनिक यातायात सुधारलाई मुख्य एजेन्डा बनाएका थिए। उनले हंगेरीको युरोपेली युनियन र नेटोसँगको बिग्रिएको सम्बन्ध सुधार्ने प्रतिबद्धता जनाएका थिए। अर्बान शासनकालमा यी सम्बन्ध कमजोर बनेका थिए भनेर एपीले लेखेको छ।
संसदका १०६ निर्वाचन क्षेत्रमध्ये करिब ९४ क्षेत्रमा मग्यार अघि देखिएका छन्। तर दुई-तिहाइ बहुमत पुग्ने–नपुग्नेबारे भने अझै स्पष्ट भइसकेको छैन।
परिणाम सार्वजनिक भएसँगै राजधानी बुडापेस्टमा उत्सवको माहोल देखिएको छ। ड्यान्युब नदी किनारमा आयोजित विजय सभामा हजारौँ समर्थकलाई सम्बोधन गर्दै मग्यारले भने, 'आज सत्यले झुटलाई जित्यो। हंगेरीका नागरिकले इतिहास फेरिदिएका छन्।'
आइतबारको निर्वाचनमा झण्डै ८० प्रतिशत मतदान भएको थियो। जुन हंगेरीको कम्युनिस्ट शासनपछि अहिलेसम्मकै उच्च हो।
यो परिणामले युरोपेली युनियन भित्रको शक्ति सन्तुलनमा पनि असर पार्ने अपेक्षा गरिएको छ। अर्बानले युरोपेली युनियनमा सर्वसम्मति आवश्यक पर्ने निर्णयहरूमा बारम्बार भिटो प्रयोग गरी अवरोध गर्दै आएका थिए। जसका कारण उनीमाथि संघभित्रै विभाजन ल्याउन खोजेको आरोप लाग्ने गरेको थियो।
युक्रेन युद्धका सन्दर्भमा पनि नयाँ सरकारको नीतिमा परिवर्तन आउने संकेत देखिएको छ। अर्बानले रूससँग नजिक सम्बन्ध राख्दै युरोपेली युनियनको युक्रेनसम्बन्धी प्रयासहरू अवरुद्ध गर्दै आएका थिए।
४५ वर्षीय मग्यार अर्बानकै पार्टी फिदेजका पूर्व सदस्य हुन्।
उनले सन् २०२४ मा पार्टी छोडेर ‘टिस्जा’ गठन गरेका थिए र छोटो समयमै अर्बानका सबैभन्दा बलिया प्रतिस्पर्धी बनेका थिए।
विश्लेषकहरूका अनुसार यो चुनावलाई पूर्व वा पश्चिम रोज्ने जनमतसंग्रहका रूपमा पनि हेरिएको थियो। अब मग्यारको जितसँगै हंगेरी फेरि युरोपेली लोकतान्त्रिक धारतर्फ फर्किने अपेक्षा गरिएको छ।
-1746009348.jpg)
