सरकार प्रवक्ता एवं शिक्षा, विज्ञान तथा प्रविधिमन्त्री सस्मित पोखरेलले संवैधानिक परिषद्ले कार्य क्षमतालाई मुख्य आधार बनाएर प्रधानन्यायाधीशमा डा. मनोजकुमार शर्मालाई सिफारिस गरेको बताएका छन्।
शुक्रबार मन्त्रिपरिषद बैठकको निर्णय सुनाउने क्रममा पत्रकारहरूले गरेको प्रश्नमा मन्त्री पोखरेलले मुद्दाको फर्छ्यौटका हिसाबमा सिफारिस गरेर पठाइएको बताएका हुन्।
'योपालि सम्भवत पहिलो पटक प्रधानन्यायाधीशको सिफारिस चाँही मुद्दाको फर्छ्यौटको हिसाबमा हामीले एउटा इन्डिकेटरको हिसावमा नै सिफारिस गरेर पठाएका छौं,' उनले भने।
यद्यपि यही नै सर्वोत्कृष्ठ पद्दति भने नभएको बताए।
'तर अहिलेसम्मको हामीले इतिहास हेर्दाखेरी उहाँहरुको कार्य क्षमताको हिसाबमा सिफारिस गरिएको पहिलो पटक हो। यसलाई क्रमवद्ध रुपमा सुधार गर्दै अझ राम्रो प्रोसेस बनाउँदै जानुपर्छ। तर यो अहिलेसम्मकै सबैभन्दा राम्रो प्रोसेस अहिले नै भएको हो भन्ने हामीलाई लाग्छ,' उनले भने।
बिहीबार बसेको संवैधानिक परिषद्को बैठकले कायममुकायम प्रधानन्यायाधीश सपना प्रधान मल्ल, कुमार रेग्मी र हरिप्रसाद फुयाललाई छाडेर चौथो वरियतामा रहेका शर्मालाई सिफारिस गरेको थियो।
यस निर्णयमा विभिन्न किसिमका टिकाटिप्पणी भइरहेका छन्।
प्रवक्ता पोखरेलले भने शक्तिपृथकीकरणको कुरा गर्ने तर नियुक्ति चाहिँ राजनीतिक जस्तै देखिने गरेको बताए।
'अहिले न्याय परिषदमा नै हेर्दा पनि ५ जना सदस्य मध्ये ३ जना लगभग राजनीतिक नियुक्ति जस्तो देखिन्छ। त्यहाँबाट सिफारिस हुने न्यायाधीश पनि राजनीतिक पृष्ठभुमिको आइराख्नु भएको छ भनेर विभिन्न कानूनविद्हरुले भन्दै नै आईरहनु भएको कुरा हो,' उनले भने।
प्रवक्ता पोखरेलले कार्य क्षमतको हिसावले प्रधानन्यायाधीश नियुक्ति गरिएको नेपालको इतिहासमा नै पहिलो दाबी पनि गरे। –न्युज एजेन्सी नेपाल
-1746009348.jpg)
