प्रमुख प्रतिपक्षी नेपाली कांग्रेसका सभापति गगन थापाले संघीय सरकारले गरेका गलत काम प्रदेश र स्थानीय सरकारहरूले नगर्न आग्रह गरेका छन्।
पार्टी केन्द्रीय कार्यालय सानेपामा आयोजित 'ग्रिन टेबल' छलफल श्रृंखलाअन्तर्गत सुकुम्बासी समस्यासम्बन्धी कार्यक्रममा सभापति थापाले सुकुम्बासी तथा अव्यवस्थित बस्ती व्यवस्थापनका नाममा कानुनभन्दा बाहिर गएर डोजर चलाउने शैली स्वीकार्य नभएको बताए।
डोजर चलाउने हल्ला र त्रासको पछि नलाग्न आग्रह गर्दै उनले कानुन, नीति र योजनाका आधारमा मात्र समस्या समाधान खोजिनुपर्नेमा जोड दिए।
'कानुनले दिएको अधिकारभन्दा बाहिर गएर केही पनि गर्न हुँदैन,' उनले भने।
सभापति थापाले दशकौंदेखि जटिल बन्दै आएको सुकुम्बासी समस्या बल प्रयोगबाट नभई योजनाबद्ध र मानवीय ढंगले समाधान गर्नुपर्नेमा जोड दिए।
वास्तविक सुकुम्बासीको पहिचान, सुरक्षित पुनर्वास, आधारभूत सेवाको सुनिश्चितता र दीर्घकालीन व्यवस्थापनलाई केन्द्रमा राखेर मात्रै कदम चाल्नुपर्ने उनको धारणा थियो।
पार्टीले यस विषयमा छुट्टै टोली बनाएर अनुगमन र मूल्यांकन गरिरहेको जानकारी दिँदै थापाले ग्रिन टेबलको छलफलबाट आएका सुझावका आधारमा सबै प्रदेश तथा स्थानीय सरकारलाई औपचारिक पत्राचार गरिने पनि जानकारी दिए।
कांग्रेसले 'ग्रिन टेबल' कार्यक्रममार्फत नीति निर्माण र जनसरोकारका विषयमा खुला संवाद अघि बढाउन थालेको छ। पार्टीभित्र सीमित रहने परम्परागत छलफलभन्दा फरक शैलीमा विज्ञ र सरोकारवालासँग प्रत्यक्ष बहस सुरू गरिनुलाई राजनीतिक वृत्तमा अर्थपूर्ण पहलका रूपमा हेरिएको छ।
राजनीतिक भाषणभन्दा समस्या समाधान केन्द्रित बहसमा जोड दिन खोजिएको कांग्रेसले जनाएको छ।
-1774347750.jpg)
-1746009348.jpg)
