पश्चिम बंगालका नयाँ मुख्यमन्त्री शुभेन्दु अधिकारीले मुख्यमन्त्रीको शपथ लिएका छन्।
कोलकाताको ब्रिगेड परेड ग्राउन्डमा आयोजित भव्य समारोहबीच पश्चिम बंगालका राज्यपाल आर.एन रविले मुख्यमन्त्री अधिकारीलाई शनिबार शपथ ग्रहण गराएका हुन्। उनले बंगाली भाषामा शपथ लिएका हुन्।
पश्चिम बंगालमा भाजपाले पहिलो पटक सरकार बनाएको हो।
वामपन्थी दलको सत्ता ढालेर १५ वर्षसम्म सरकारमा रहेको तृणमूल कंग्रेसलाई भाजपाले यसपालिको बिधानसभा चुनावबाट पाखा लगाएको थियो।
कुल २९४ सिट रहेको पश्चिम बंगाल विधानसभामा यसपालि भाजपाले दुई तिहाई शक्तिका साथ सरकार बनाउँदै छ।
ऐतिहासिक जितपछि मुख्यमन्त्री नियुक्त भएका अधिकारीको शपथ ग्रहण समारोहमा प्रधानमन्त्री नरेन्द्र मोदी, गृहमन्त्री अमित शाह, रक्षामन्त्री राजनाथ सिंह लगायत भारतीय जनता पार्टी (भाजपा)का शीर्ष नेताहरूको उपस्थिति थियो।
मुख्यमन्त्री अधिकारीसँगै दिलिप घोष, अग्निमित्र पाउल, अशोक किर्तानिया, खुदिराम तादू र निशिथ प्रमानिकले पनि मन्त्री पदको शपथ लिएका छन्।
शपथअघि अधिकारीले कोलकातामा प्रधानमन्त्री मोदीलाई स्वागत गर्नु गर्वको क्षण भएको बताएका थिए।
'आज हामी संस्थापक पुस्ताले देखेको सपना साकार हुँदै गरेको देखिरहेका छौं,' उनले लेखेका थिए।
शुक्रबार मात्रै गृहमन्त्री अमित शाहको उपस्थितिमा बसेको भाजपा विधायक दलको बैठकले अधिकारीलाई दल नेता चयन गरेको थियो।
त्यसपछि उनले राज्यपाल आरएन रविलाई भेटेर सरकार गठनको दाबी पेश गरेका थिए।
मे ४ मा सार्वजनिक विधानसभा चुनावको परिणाममा २९३ सिटमध्ये भाजपा ले २०७ सिट जित्दै स्पष्ट बहुमत हासिल गरेको थियो।
बनर्जीको अल इन्डिया तृणमूल कंग्रेस (टिएमसी)ले ८० सिट मात्रै जितेको थियो।
चुनाव परिणाम सार्वजनिक भएपछि पश्चिम बंगालको राजनीतिमा तीव्र उतारचढाव देखिएको थियो।
ममता बनर्जीले चुनावमा धाँधली भएको आरोप लगाउँदै राजीनामा दिन अस्वीकार गरेकी थिइन्। उनले निर्वाचन आयोग भाजपा आयोगमा परिणत भएको आरोप समेत लगाएकी थिइन्।
मे ५ मा ममता बनर्जीले पत्रकार सम्मेलन गर्दै आफू चुनाव नहारेको दाबी गरेकी थिइन्।
उनले मुख्यमन्त्री पदबाट राजीनामा नदिने घोषणा गरेपछि भाजपा ले त्यसलाई हास्यास्पद भनेको थियो।
टीएमसी महासचिव अभिषेक बनर्जीले मतगणना केन्द्रको सिसिटीभी फुटेज सार्वजनिक गर्न माग गरेका थिए।
चुनाव परिणामपछि राज्यका विभिन्न क्षेत्रमा टीएमसी कार्यालयमाथि आक्रमण, आगजनी, तोडफोड तथा कार्यकर्ताका घरमा हमला भएको खबर सार्वजनिक भएको थियो।
भाजपाले भने कानुनले आफ्नो काम गर्ने र कुनै अपराधीलाई पार्टीमा प्रवेश गर्न नदिने जनाएको थियो।
मे ६ को राति शुभेन्दु अधिकारीका निजी सहायक चन्द्रनाथ रथको गोली हानेर हत्या भएको थियो। भाजपा ले घटनालाई सुनियोजित हत्या भनेको थियो भने टीएमसीले घटनाको निन्दा गर्दै निष्पक्ष छानबिनको माग गरेको थियो।
प्रहरीले घटनाबारे अनुसन्धान गरिरहेको छ।
ममताले राजीनामा नदिएपछि राज्यपाल आर एन रविले मे ७ मा विधानसभा भंग गरेका थिए। त्यससँगै पश्चिम बंगालमा नयाँ सरकार गठनको बाटो खुलेको थियो।
मे ८ मा कोलकातामा बसेको भाजपा विधायक दलको बैठकमा अमित शाहले शुभेन्दु अधिकारीलाई औपचारिक रूपमा विधायक दलको नेता घोषणा गरेका थिए।
उनले अधिकारीको नाममा मात्रै प्रस्ताव र समर्थन आएको भन्दै उनलाई सर्वसम्मत रूपमा नेता चयन गरिएको बताएका थिए। त्यसपछि भाजपा नेताहरूले राज्यपाललाई भेटेर सरकार गठनको दाबी पेश गरेका थिए।
ममता बनर्जीको जिद्दी र भाजपाभित्रको आन्तरिक कारण दुई तिहाई प्राप्त भए पनि भाजपालाई सरकार बनाउन समय लागेको हो।
को हुन् शुभेन्दु अधिकारी?
मुख्यमन्त्रीमा सुरूवातदेखि नै अधिकारी सबैभन्दा बलियो दाबेदार थिए।
यसअघि उनी विधानसभामा विपक्षी नेता थिए। उनले पूर्वी मेदिनीपुर क्षेत्रमा बलियो संगठनात्मक आधार बनाएका छन्। एक समय ममता बनर्जीका निकट सहयोगी रहेका अधिकारी सन् २०२१ अघि मात्रै भाजपा प्रवेश गरेका थिए।
यसपटक उनले भवानीपुरबाट ममता बनर्जीलाई नै पराजित गरेपछि उनको राजनीतिक हैसियत थप मजबुत भएको छ।
भाजपाभित्र ममता बनर्जीको तृणमूल कांग्रेस (टिएमसी) सँगको विगत र राष्ट्रिय स्वयंसेवक दल (आरएसएस) को पृष्ठभूमि नहुनु उनको दाबेदारीमा केही प्रश्न उठाउने आधार बन्न सक्ने आशंका थियो।
यद्यपि भाजपाले उनलाई दल नेता चयन गरी पश्चिम बंगालमा पहिलो भाजपा सरकारको नेतृत्वको जिम्मेवारी दिएको हो।
