रूसी राष्ट्रपति भ्लादिमिर पुटिनले रूस-युक्रेन युद्ध अन्त्यतिर पुगेको दाबी गरेका छन्।
मस्कोमा विजय दिवस समारोहपछि शनिबार पत्रकारहरूसँग कुरा गर्दै उनले ४ वर्षदेखिको युद्ध अन्त्य हुन लागेको संकेत दिएको भनेर अन्तर्राष्ट्रिय समाचार संस्था रोयटर्सले लेखेको छ।
'यो विषय अब अन्त्यतिर पुगेको जस्तो लाग्छ,' उनले पत्रकारहरूसँग भने।
उनले युद्ध अन्त्यका लागि अमेरिकी राष्ट्रपति डोनाल्ड ट्रम्पले इमानदार प्रयास गरिरहेको पनि बताए।
'अमेरिकी राष्ट्रपतिले इमानदारिताका साथ प्रयत्न गरिहनुभएको छ। मे ९ देखि ११ सम्म युद्धविराम र युद्धबन्दी आदानप्रदानको प्रस्तावलाई पनि हामीले तत्कालै स्वीकार गर्यौं,' उनले भने।
विजय दिवसका अवसरमा ट्रम्पले टेलिफोनमार्फत भएको कुराकानी पनि अत्यन्त सौहार्दपूर्ण रहेको पुटिनले बताएका छन्।
यद्यपि रूसले मे ५ मै युक्रेनलाई ५०० बन्दी साटासाट गर्ने प्रस्ताव पठाएको तर किभबाट कुनै प्रतिक्रिया नआएको पुटिनले बताएका छन्।
युक्रेनले युद्धविराम घोषणाप्रति कुनै प्रतिक्रिया नदिएको आरोप पनि लगाए। तर शनिबारदेखि सोमबारसम्म लागू गरिएको युद्धविरामका क्रममा मस्को वा किएभबाट उल्लंघन भएको कुनै रिपोर्ट सार्वजनिक भएको छैन।
पुटिनले युक्रेनी राष्ट्रपति भोलोदिमिर जेलेन्स्कीसँगको भेटवार्ताबाट आफू नभागेको तर भेट अन्तिम शान्ति सम्झौतामा हस्ताक्षरका लागि मात्र हुनुपर्ने बताएका छन्।
'जो भेट्न चाहन्छ, मस्को आउन सक्छ,' उनले भने।
भेटवार्ता कुनै तेस्रो मुलुकमा पनि गर्न सकिने उनले बताए।
'जेलेन्स्की जुन देशमा भन्छन् त्यही देशमा भेट्न तयार छु। तर त्यो अन्तिम सम्झौतामा हस्ताक्षरका लागि हुन पर्छ,' उनले भने।
