नेपाली कांग्रेसका सभापति गगन थापाले पार्टी विधानअनुसार हरेक वर्ष कांग्रेस क्रियाशील सदस्यता नवीकरण गर्नुपर्ने व्यवस्था रहेको र त्यसलाई डिजिटल बनाउन यसपालि अद्यावधिक गर्न लागिएको बताएका छन्।
पार्टी वडा कार्यालयमा पुगेर क्रियाशील अद्यावधिक गराउन पनि उनले आग्रह गरेका छन्।
पार्टीको पुरानै विधानअनुसार क्रियाशील अद्यावधिक गर्न लागिएको उनले बताए।
‘पार्टी सभापति वा वडा सभापति भनेको जिम्मेवारी हो। विधानले नै वडा सभापतिलाई ५ वर्ष काम गर्ने भन्छ, त्यसलाई सजिलो बनाइएको छ। अपडेट गरौं भनिएको छ। वडा सभापतिले प्रविधि जानेको जनशक्ति चाहिन्छ भने व्यवस्था गरिन्छ तर म क्रियाशील अपडेटको काम गर्दिनँ भन्नुहुन्छ भने धन्यवाद, तपाईंको ठाउँमा अर्को साथीले जिम्मा लिनुहुन्छ, क्रियाशील अपडेट गर्नुहुन्छ,’ सभापति थापाले धनगढीमा शनिबार आयोजित कार्यक्रममा भने।
हरेक वर्ष दुई सय रूपैयाँ तिरेर क्रियाशील अद्यावधिक गर्नुपर्ने विधानको व्यवस्था रहेको उनले बताए।
‘विधानअनुसार असोजको १५ औं महाधिवेशनमा भाग लिने सदस्यले एक हजार रूपैयाँ क्रियाशील सदस्यता शुल्क तिर्नुपर्थ्यो, हामीले संशोधन गरी दुई सय बनायौं, हरेक वर्ष नवीकरण गर्नुपर्थ्यो, एकपटक आवेदन हुने बनायौं,’ उनले भने।
नवीकरण गर्न फेरि वडा जाने वा फेरि फारम भर्ने भन्ने प्रश्न गरेका नेताहरूलाई लक्ष्य गर्दै उनले अहिले अद्यावधिक मात्र गर्न लागिएको बताए। पार्टीमा ८ लाख क्रियाशी सदस्य भए पनि ८० हजार जनाको मात्र मोबाइल नम्बर पार्टीसँग रहेको उनको भनाइ थियो।
मोबाइल नम्बर र पार्टीमा निरन्तर क्रियाशील रहन चाहेको विवरण दिए क्रियाशील अद्यावधिक हुने उनको भनाइ छ।
