नेकपा एमालेकी सांसद पद्माकुमारी अर्यालले राष्ट्रिय स्वतन्त्र पार्टीलाई लक्ष्य गर्दै हिजो अध्यादेशको विरोध गर्नेहरू आज त्यही बाटो हिँडिरहेको बताएकी छन्।
आज प्रतिनिधि सभा बैठकमा बोल्दै उनले भनिन्, ‘मलाई हिजोका दिनहरू याद आइरहेका छन्- हिजो अध्यादेशलाई लोकतान्त्रिक मूल्य र मान्यतामाथिको आघात भन्दै यही सदन तताउनेहरू आज स्वयम त्यही बाटोमा निर्धक्क हिँडिरहनुभएको छ। यो राजनीतिक विवेकको परिपक्वता हो कि सत्ता सुविधाअनुसार बदलिएको नैतिकता? जनताले यसलाई रूपान्तरण भनेर बुझ्ने कि निर्लज्जताको पराकाष्ठा भनेर चिन्ने?’
सरकारले हालै ८ वटा अध्यादेश ल्याएको थियो।
प्रधान न्यायाधीश नियुक्ति सिफारिसले स्थापित मान्यतालाई खण्डित गरेको पनि उनको भनाइ छ। ‘न्यायपालिका प्रमुख को हुने भन्ने कुरा विधिले होइन प्रधानमन्त्रीको तजबिजले निर्माण गर्ने खतरनाक भास्य निर्माण गरिएको छ,’ उनले भनिन्।
राजनीतिक आस्था बन्देज गर्ने गरी विद्यार्थी संघसंगठन र ट्रेड युनियन खारेज गर्नेजस्ता विषय अध्यादेशमा आएको उनले बताइन्।
उनले सुकुम्बासी र अव्यवस्थित बसोबासीलाई सरकारले डोजर आतंक सिर्जना गरेको पनि बताइन्।
