नेपाली कम्युनिस्ट पार्टी (नेकपा) का प्रमुख सचेतक युवराज दुलालले प्राकृतिक विपत्ति आउनुपूर्व मानव सिर्जित विपत्ति ल्याउन सरकार लागिपरेको टिप्प्णी गरेका छन्।
सोमबार प्रतिनिधिसभा बैठकमा बोल्दै सांसद दुलालले मानव बसोबास रहेका बस्तीहरूमा २४ घन्टे अल्टिमेटम दिएर मान्छेहरूलाई सम्पूर्ण सुरक्षा फौजको आतंक देखाएर, डोजरको आतंक देखाएर आत्महत्या गर्नुपर्ने बाध्यता सिर्जना गरिएको बताएका छन्।
'जहाँनिया राणा शासन, निरंकुश राजतन्त्रविरूद्ध नेपाली जनताले पटक पटक सशस्त्र संघर्ष, शान्तिपूर्ण जनआन्दोलनद्वारा स्थापित लोकतन्त्र हो यो। यो लोकतन्त्रमा संघीय लोकतान्त्रिक गणतन्त्रको संविधान छ। यहाँ संविधानको मौलिक हकका रूपमा आवासको हकको ग्यारेन्टी गरिएको छ। यस्तो अवस्थामा राज्य प्राकृतिक विपत्ति आउनुपूर्व मानव सिर्जित विपत्ति ल्याउन उद्यत छ,' उनले भने, 'मानवहरू बसिराखेका बस्तीहरूमा २४ घन्टे अल्टिमेटम दिएर सम्पूर्ण सुरक्षाफौजको आतंक देखाएर, डोजरको आतंक देखाएर आत्महत्या गर्नुपर्ने अवस्था सिर्जना गरिएको छ।'
'सरकारलाई इन्द्रबहादुर राईहरूको आत्महत्या दुरूत्साहनको मुद्दा लाग्ने कि नलाग्ने?' उनले प्रश्न पनि गरे।
राई सुकुम्बासी बस्ती भत्काएकै दिन बल्खु खोलामा मृत फेला परेका थिए। घर भत्काएको पीडा सहन नसकेकाले राईले आत्महत्याको बाटो रोजेको उनको परिवारको दाबी छ।
प्रहरीले मृत्युको कारण नखुलेको र बल्खु खोलामा उनको शव बग्दै आएको अवस्थामा फेला पारेको बताएको थियो।
'विधिको शासन, रूल अफ लको नारा दिएर आएको सरकार रुल बाइ अर्डिनेन्स अर्थात् अध्यादेशबाट देश चलाउने सपना देखिराखेको त छैन? यसले सत्तारूढ दलकै झन्डै दुईतिहाइ जनप्रतिनिधिहरूलाई गिज्याइरहेको त छैन? यो के हो? लोकतन्त्रको उन्नत अभ्यास हो?' उनले भने।
