राष्ट्रिय स्वतन्त्र पार्टीका सांसद गणेश कार्कीले अपवादबाहेक आत्महत्या र आत्मदाहको समाचार नलेख्ने सेतोपाटीको सम्पादकीय नीतिबारे प्रतिनिधिसभाको बिहीबारको बैठकमा चर्चा गरेका छन्।
सांसद कार्कीले संसदमा प्राय: मिडियामा आउने नकारात्मक विषयले मात्र चर्चा पाउने गरेको उल्लेख गर्दै राम्रो कुरामा धन्यवाद कमै दिने गरिएको बताए।
'अखबार, छापा, अनलाइनले हामीले गल्ती गरेका थियौं, प्रोभोक गर्यौं, ट्रिगर गर्यौं भनेका कुरा कमै हुन्थे। अपवादका रूपमा देखिएको छ सेतोपाटी, उसले सम्पादकीय नै लेखेर भनेको छ- अपवादबाहेक आत्मदाह र आत्महत्याका समाचार अब लेख्दैनौं,' कार्कीले भने, 'आत्मदाह र आत्महत्याको फरकपनमा केही समस्या छ। केटाकेटीमा विज्ञानमा पढेको 'सबै अल्कालिन क्षार हुन्। सबै क्षार अल्कालिन होइनन्' भनेजस्तै हो ... लेख्न जानिएन भने समाज ट्रिगर हुन्छ र एकदमै धेरै त्यस्ता कुरा बढ्न थाल्छन् भनेर एउटा मिडियाले स्वीकार गरेर अब सच्चिन्छौं भन्नु सामान्य कुरा होइन।'
उनले समाचारले मात्र नभएर मिथ्यांकले पनि कतिपय अवस्थामा मान्छेलाई उक्साउने बताए।
'मिथ्यांकले पनि, गलत जानकरीले पनि र जानकारी तोडमोड गरिएको खण्डित सत्यले पनि मान्छेलाई उक्साइरहेको छ,' कार्कीले भने, 'लोकसेवा परीक्षा रोकियो भनेर यहीँ कुरा उठ्यो। कहाँ लोकसेवा रोकियो? नपुगेका ठाउँमा ओएनएम हुन्छ भनिराखेको छ सरकारले। दुई बुँदा नपढेर खण्डित सत्य हामी पढिरहेका छौं।'
उनले संसदमा गृहमन्त्री सुधन गुरूङले 'तिमीहरू नै गृहमन्त्री बन' भनेर नभनेको बताए।
'हामी यहीँ बसिराखेका थियौं, सुनेनौं,' कार्कीले भने, 'यसरी खण्डित सत्यहरू उक्साउने कुरा मिडियाले मात्र होइन, संसदले पनि गरिराखेको छ। नगरौं भन्न चाहन्छु।'
यो पनि:
