प्रधानमन्त्री बालेन्द्र शाह भारतको राजकीय भ्रमणका लागि आज दिउँसो प्रस्थान गर्दैछन्। तर भ्रमणमा जानुअघि उनले राष्ट्रपति रामचन्द्र पौडेललाई भ्रमणबारे जानकारी गराएका छैनन्। त्यस्तै, पूर्वप्रधानमन्त्री तथा राजनीतिक दलहरूसँग पनि उनले छलफल गरेका छैनन्।
विगतमा प्रधानमन्त्री विदेश भ्रमणमा जानुअघि राष्ट्रपतिलाई भेटेर भ्रमणको तयारी, एजेन्डा तथा राष्ट्रिय हितका विषयमा जानकारी गराउने प्रचलन थियो।
यसअघि भारत भ्रमणमा गएका तत्कालीन प्रधानमन्त्री पुष्पकमल दाहाल ‘प्रचण्ड’ ले शीतल निवास पुगेर राष्ट्रपतिलाई भ्रमणबारे जानकारी गराएका थिए।
तर प्रधानमन्त्री शाहले यसपटक राष्ट्रपतिलाई ब्रिफिङ नगरेको राष्ट्रपतिका प्रेस सल्लाहकार किरण पोखरेलले बताए। ‘प्रधानमन्त्रीज्यूले राष्ट्रपतिज्यूलाई भेटेर भारत भ्रमणबारे ब्रिफिङ गर्नुभएको मेरो जानकारीमा छैन,’ उनले सेतोपाटीसँग भने।
प्रधानमन्त्री शाहले यसअघि संयुक्त राष्ट्रसंघको ८१औँ महासभामा सहभागी हुन असोज ६ गते अमेरिका जाँदा पनि राष्ट्रपतिलाई भ्रमणबारे जानकारी गराएका थिएनन्।
विगतमा प्रधानमन्त्री विदेश भ्रमणमा जानुअघि पूर्वप्रधानमन्त्रीहरूसँग पनि छलफल गर्ने अभ्यास थियो। तत्कालीन प्रधानमन्त्री केपी शर्मा ओलीले भारत भ्रमणमा जानुअघि पूर्वप्रधानमन्त्रीहरूलाई बोलाएर छलफल गरेका थिए। तर प्रधानमन्त्री शाहले यसपटक पूर्वप्रधानमन्त्रीहरूसँग मात्र होइन, राजनीतिक दलहरूसँग पनि परामर्श गरेका छैनन्।
यसप्रति प्रमुख प्रतिपक्षी नेपाली कांग्रेसले असन्तुष्टि जनाएको छ। कांग्रेसका वरिष्ठ उपसभापति विश्वप्रकाश शर्माले मित्रराष्ट्रको महत्त्वपूर्ण भ्रमणअघि राष्ट्रिय हितका विषयमा साझा धारणा बनाउन प्रमुख प्रतिपक्षीलगायत राजनीतिक दलहरूसँग छलफल गर्ने लोकतान्त्रिक परम्परा रहेको बताएका छन्।
उनले यस्तो परम्परालाई वर्तमान सरकारले पनि निरन्तरता दिनुपर्ने बताएका छन्। कांग्रेसले विज्ञप्तिमार्फत प्रधानमन्त्रीको भारत भ्रमण सफलताको शुभकामना दिँदै भ्रमणलाई सार्थक बनाउन केही सुझावसमेत दिएको छ।
प्रधानमन्त्रीका मिडिया व्यवस्थापन संयोजक दीपा दाहालले भने प्रधानमन्त्रीले राष्ट्रपतिलाई ब्रिफिङ गर्ने विषयमा आफूलाई जानकारी नभएको बताएकी छन्।
प्रधानमन्त्री शाह ३४ सदस्यीय सरकारी टोलीको नेतृत्व गर्दै आज दिउँसो भारत प्रस्थान गर्नेछन्। उनी नेपाल एयरलाइन्सको नियमित उडानबाट आइतबार दिउँसो १ बजेर ४५ मिनेटमा नयाँदिल्ली जाने कार्यक्रम छ।
भ्रमण टोलीमा अर्थमन्त्री स्वर्णिम वाग्ले, परराष्ट्रमन्त्री शिशिर खनाल, प्रधानमन्त्रीका मुख्य सल्लाहकार कुमार बेन, राजनीतिक सल्लाहकार असिम शाहलगायत उच्चपदस्थ अधिकारी सहभागी हुनेछन्।
प्रधानमन्त्री शाहले मंसिर ७ गते भारतीय प्रधानमन्त्री नरेन्द्र मोदीसँग प्रतिनिधिमण्डलस्तरीय वार्ता गर्ने कार्यक्रम छ।
भ्रमणका क्रममा दुई देशबीच सम्पर्क सञ्जाल विस्तार तथा ऊर्जा क्षेत्रका परियोजना उद्घाटन गर्ने तयारी छ। साथै व्यापार, पारवहन, लगानी, पूर्वाधार र आर्थिक सहकार्यका विषयमा छलफल हुनेछ।
प्रधानमन्त्री विदेश भ्रमणमा जाँदा प्रधानमन्त्रीको सिफारिसमा राष्ट्रपतिले दैनिक सरकारी कामकाज सञ्चालनका लागि कार्यवाहक प्रधानमन्त्री तोक्ने व्यवस्था छ। प्रधानमन्त्रीको अनुपस्थितिमा सरकारको दैनिक कामकारबाही प्रभावित नहोस् भन्ने उद्देश्यले यस्तो व्यवस्था गरिएको हो।