गोरखामा ‘ठगी’ गरेर पाँच वर्षदेखि सम्पर्कविहीन ध्रुबबाबु जोशी ललितपुरको एक चर्चबाट हालै पक्राउ परे।
महानगरीय प्रहरी परिसर ललितपुरले जोशीलाई पक्राउ गरेपछि उनीविरूद्ध एकपछि अर्को ठगीको मुद्दा परेका छन्। जवरजस्ती करणी अभियोगमा जाहेरी परेपछि जोशीलाई प्रहरीले चर्चबाटै पक्राउ गरेको थियो।
गोरखा बजारका स्थायी बासिन्दा जोशी पहिले तत्कालीन नेपाल कम्युनिष्ट पार्टी माओवादीको राजनीतिक संरक्षणमा महेन्द्रज्योति माध्यामिक विद्यालय व्यवस्थापन समितिमा अध्यक्ष थिए। २०६९ सालमा विद्यालयमा शौचालय निर्माण गर्न लिएको पेश्की रकम उनले अझै फिर्ता गरेका छैनन्।
विद्यालयका प्रधानाध्यापक भाइकाजी श्रेष्ठका अनुसार समिति अध्यक्ष जोशीले शौचालय निर्माण गर्न दुई लाख चार हजार रूपैयाँ पेश्की लगे तर शौचालय बनाएनन्। जोशीको नाममा अहिले पनि विद्यालयमा बक्यौता रकम छ।
विद्यालयछेउ गोरखा नगरपालिका वडा नम्बर ६ छहरे घर भएका जोशीमाथि यसअघि आफ्नै सालीमाथि यौन दुराचारको पनि आरोप लागेको थियो। जोशीले पार्टी प्यालेससहित रेष्टुरेन्ट चलाइरहेको घरमा झुण्डिएर सालीले आत्महत्या गरेकी थिइन्।
यौन दुराचार गरेर गर्भवती भएकोले सालीले आत्महत्या गरेको आरोप लागेपछि जोशी पक्राउ पनि परे। २०७१ सालमा जिल्ला प्रहरी कार्यालय गोरखाले जोशीलाई पक्राउ गर्यो। तर कारबाही प्रक्रिया अघि बढेन। प्रहरीबाट छुटेपछि जोशी गोरखा बजारमा देखिएका थिएनन्।
गत साता जोशीलाई ललितपुर प्रहरीले कुसुन्तीस्थित चर्चबाटै पक्राउ गर्यो। गोरखाबाट सम्पर्कविहीन जोशीले श्रीमतीकै नाममा आशा विश्वासी मण्डली चर्च चलाएर आफू पास्टर बनेर बसेका रहेछन्।
पुस २७ गते एक महिलाले आफूमाथि पटकपटक पास्टर जोशीले जवरजस्ती करणी गरेको आरोपमा जाहेरी दिएपछि भोलिपल्ट जोशी पक्राउ परे। महानगरीय प्रहरी परिसर जावलाखेलमा एक महिलाले दिएको जाहेरीपत्रमा आशाविश्वासी मण्डली चर्चका पास्टर जोशीले तीन महिनादेखि पटकपटक जवरजस्ती करणी गरेको उल्लेख छ।
२१ वर्षकी एक बाथ र खुट्टा काम्ने रोगबाट पीडित महिलामाथि जोशीले जवरजस्ती करणी गरेको आरोप छ। ‘तीन महिना पहिले, पहिलोपटक ललितपुरको चापागाउँको एक गेष्ट हाउसमा बोलाएर ढोका बन्द गरी मेरो इच्छा विपरीत पास्टर जोशीले जवरजस्ती करणी गरे।
दोस्रो र तेस्रोपटक नख्खीपोटस्थित आफ्नै पसलमा धाकधम्की दिएर जवरजस्ती करणी गरे,’ ती महिलाले जोशीविरूद्ध दिएको जाहेरीमा भनेकी छन्।
दश वर्षदेखि क्रिश्चियन धर्ममा लागेकी ती महिला रोगले च्याप्दै गएपछि समस्यामा थिइन्। पास्टर जोशीले रोग निको पारिदिने आश्वासनमा पटकपटक जवरजस्ती करणी गरेको ती महिलाको भनाइ छ। जोशीले ती महिलासँग शारीरिक सम्पर्क गर्न अनेक वाहना अपनाएका थिए।
‘तिमीले सानो बच्चा अवस्थामा धेरैसँग शारीरिक सम्पर्क गरेको रहेछौं। तिमीले गरेको पाप मेटाउनका लागि तिमीले मसँग शारीरिक सम्पर्क गर्नुपर्छ।
म प्रार्थना बस्दा परमेश्वरले मलाई यस्तो भन्नुभएको,’ ती महिलाले भनेकी छन्, ‘तिमीले मसँग शारीरिक सम्पर्क गर्नुपर्छ। तिमीले गरेको पाप नाश भएर जान्छ भनेर मलाई पास्टरले ललाईफकाइ विश्वासमा लिई जवरजस्ती करणी गरेको हो।’
पास्टर जोशीले शारीरिक सम्पर्क गरेको कुरा कसैलाई भनेमा परमेश्वरले दिएको शक्ति नाश भएर जाने पनि धम्की दिएको ती महिलाले प्रहरीमा दिएको जाहेरीमा उल्लेख गरेकी छन्।
‘शारीरिक सम्पर्क गरेको कुरा कसैलाई भनेमा परमेश्वरले दिएको शक्ति नाश भएर जान्छ। जे पनि गर्न सक्छु म भन्ने धाकधम्की दियो। परिवार र साथीभाइलाई मसँग शारीरिक सम्पर्क गरेको कुरा भनिदिन्छु भनेर पसलै आएर जवरजस्ती गरे,’ ती महिलाले भनेकी छन्।
रोग निको हुने नाममा पास्टरले जवरजस्ती जारी राखेपछि ती महिलाले न्यायका लागि प्रहरीको ढोका ढक्ढक्याएकी हुन्।
महानगरीय प्रहरी परिसर ललितपुरकी प्रवक्ता प्रहरी उपरीक्षक दुर्गा सिंहले जोशीविरूद्ध म्याद थप गरी अनुसन्धान अघि बढाइएको जानकारी दिइन्।
‘हामी अनुसन्धान गर्दैछौं। अब उनलाई अदालतमा पेश गर्ने तयारी छ,’ सिंहले सेतोपाटीसँग भनिन्। जोशीविरूद्ध परिसरमा ठगीका उजुरी पनि परेका छन्।
-1763886130.jpeg)
-1746009348.jpg)
