२४ वर्षीय अनिल ढुंगाना भक्तपुरको सूर्यविनायक नगरपालिकामा बस्थे। काभ्रे मण्डनदेउपुर घर भएका उनी हाल प्रहरी हिरासतमा छन्।
उनलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो।
कार्यालयको टोलीले उनलाई अनलाइनमार्फत गरिने बेटिङका एजेन्ट भनेर पक्राउ गरेको एसएसपी सानुराम भट्टराईले जानकारी दिए।
प्रहरीले उनका गतिविधि र कारोबारबारे तीन महिनादेखि अनुसन्धान गरिरहेको थियो।
नेपालमा सट्टेबाजी गर्न र क्रिप्टोकरेन्सीको कारोबार गर्न प्रतिबन्ध छ। तर प्रहरीले गरेको अनुसन्धानमा उनले अर्बौंको कारोबार गरिसकेको फेला पारेको हो।
ढुंगानाले प्लस टुमा म्यानेजमेन्टको विषय पढेका थिए। उनलाई केही ग्राफिक्सबारे पनि ज्ञान छ।
उनी एकाएक एजेन्ट भएका व्यक्ति भने होइनन्।
अनुसन्धानमा संलग्न प्रहरी अधिकारीहरूका अनुसार बेटिङका एजेन्टहरूले क्रिप्टोकरेन्सीको खाता खोल्न अनिवार्य जस्तै छ।
‘क्रिप्टोकरेन्सी बिना कोही पनि एजेन्ट बन्न सक्दैनन्। उनीहरूले अनिवार्य रूपमा त्यसको खाता खोल्न पर्ने हुन्छ,’ अनुसन्धानमा संलग्न एक प्रहरीले भने।
विशेषगरी बेटिङ र क्रिप्टोको कारोबार गराउने प्रमुख गन्तव्य रूस रहेको ती अनुसन्धान अधिकारी बताउँछन्।
'त्यसरी रूसी एजेन्टले नेपाल, भारत लगायत देशलाई हेर्ने छुट्टै एजेन्ट पनि खडा गरेको हुनसक्छ। त्यस्ता एजेन्टहरूले पनि थप एजेन्टहरू बनाउन खोज्छन्। जसका लागि उनीहरूले मेसेन्जर/ ह्वाट्सएपमार्फत अन्जान व्यक्तिहरूलाई प्रस्ताव राख्ने गरेको अनुसन्धानमा देखिन्छ,' उनले भने।
अनिल पनि त्यसरी नै एजेन्ट बनेको भेटिएको ती अधिकारीले भने। उनलाई यस्तो प्रस्ताव सन् २०१९मा आएको खुलेको एसएसपी भट्टराईले बताए। त्यसयता उनले निरन्तर रूपमा एजेन्ट बनेर कारोबार गर्दै आएका थिए।
यसरी कारोबार गर्न सुरूमा उनले क्रिप्टोकरेन्सीको खाता खोलेका थिए।
एजेन्ट बन्न सुरूमा केही डलर बराबरको क्रिप्टो धरौटी स्वरूप माथिल्लो एजेन्टलाई बुझाउँछन्। त्यसबापत उनले आफ्नो खातामा क्रिप्टो बराबरको नेपाली रकम जम्मा गरिदिने गरेको प्रहरीको अनुसन्धानबाट खुलेको छ।
ढुंगानाले बाइनान्स क्रिप्टोको काम गर्ने गरेको देखिएको छ।
एजेन्टको काम कसरी गर्ने, मानिसहरूलाई बेटिङ कसरी खेलाउने भन्ने खालका कुराहरू मेसेजमार्फत नै सिकाउने गरेको देखिन्छ।
‘सिक्रेट मेसेजमा उनीहरूले कुराकानी गरेर केकस्तो काम गर्ने भन्ने सिकाउने गरेको देखिन्छ। यसो गर्दा एउटा एजेन्टले अर्को एजेन्टलाई समेत नचिन्ने अवस्था रहन्छ,’ अनुसन्धानमा संलग्न प्रहरीले भने।
प्रहरीका अनुसार वानएक्स बेट एप वा अनलाइनबाट बेटिङ गराउन ढुंगानाले विभिन्न व्यक्तिहरूको नाममा खाता खोलेको पनि देखिएको छ। यसरी धेरै वटा खाताको प्रयोग गरी कारोबार गर्दा बैंकको नजरबाट बच्न सकिने सोचले दुरूपयोग गरेका थिए।
यसरी बेटिङ खेलाउने क्रममा कसैले उनको खातामा पैसा लोड गरिदिएबापत ५ प्रतिशत कमिशन पाउने बताएका छन्। त्यस्तै कसैलाई पठाइदिएबापत भने २ प्रतिशत कमिशन पाउँछन्।
यसरी ७ प्रतिशत कमिशन पाउने हिसाबले उनले एजेन्टको काम गर्दै आएको ती प्रहरी अधिकारीले बताए।
अनीलले विभिन्न व्यक्तिहरूको नाममा रहेको ११ वटा कनेक्ट आइपिएसमा ५५ वटा बैंक खाता लिंक गरेको भेटिएको छ। जसबाट ४८ करोड ८० लाख ७ हजार ३१६ रुपैयाँको कारोबार गरेका छन्।
१५ वटा बैंकिङ वालेटबाट ५ करोड ९३ हजार ७८२ रुपैयाँको कारोबार गरेका छन्। ५३ वटा बैंक खाताहरू प्रयोग गरी ६१ करोड ६४ लाख ५९ हजार १२० बराबरको कारोबार देखिएको हो।
ढुंगानाको क्रिप्टोकरेन्सी बाइनान्समा दुई वटा खाता भेटिएको छ। उनले २४२ वटा क्रिप्टोको कारोबार गरेका छन्। जसको नेपाली मूल्यअनुसार एक अर्ब ३४ करोड छ।
त्यसैगरी उनले वानएक्स बेटमार्फत मात्रै नभएर आफैले छुट्टै बेटिङ संजाल समेत खोलेका छन्।
जुवा ३५६ नामको फेसबुक पेज बनाएर प्रचारप्रसार समेत गरेको प्रहरीले जनाएको छ।
प्रहरीसमक्ष उनले उक्त सञ्जाल आफैले खोलेको र सञ्चालक नै आफू रहेको बयान दिएका छन्।
यसबाट धेरै कमिशन पाउने लोभले उनले यो बेटिङ संजाल खोलेको बताएका हुन्।
यसरी बैंक खाता, वालेट र क्रिप्टो गरी उनले कुल २ अर्ब १ करोड १८ लाख ४४ हजार १०२ रुपैयाँ कारोबार गरेको प्रहरीको अनुसन्धानले जनाएको छ। यद्यपि यसमा सट्टेबाजी खेल्ने व्यक्तिहरू पनि पहिचान गर्न सकिने प्रहरी अधिकारीहरू बताउँछन्।
उनीबाट प्रहरीले विभिन्न व्यक्तिका नाममा पायोनियर कार्ड बरामद गरेको छ। क्रिप्टोको कारोबार गर्ने लेड्जर डिभाइस पनि बरामद गरेको छ।
३५ वटा सिमकार्ड, ढुंगानाका ७ वटा चेक बुक, चार वटा एटिएम, विभिन्न व्यक्तिका ११ वटा चेकबुक, म्याकबुक, वाइफाइ राउटर, ६ वटा मोबाइल, भारतीय सिम, भारतीय आधार कार्ड लगायत बरामद गरेको छ।
यसबारे थप अनुसन्धान गर्न उनलाई जिल्ला प्रहरी परिसर भक्तपुर पठाएको छ।
उनीमाथि मुलुकी अपराध संहिता २०७४को दफा १२५ जुवा खेल्न वा सट्टाबाजी गर्न नहुने कसुर, दफा २६२ (क) अभौतिक मुद्राको प्रयोग गर्न नहुने कसुर, बैंकिङ कसुर लगायतमा अनुसन्धान गर्ने प्रहरीको तयारी छ।