अवैध रूपमा ल्याएको सुन धनीलाई नदिन अपहरणको नाटक गरेको आरोपमा प्रहरीले एक जनालाई पक्राउ गरेको छ।
काठमाडौं उपत्यका अपराध अनुसन्धान कार्यालयको टोलीले एक जनालाई पक्राउ गरेको हो।
पक्राउ पर्नेमा झापा बिर्तामोड बस्ने ३८ वर्षीय सूर्यबहादुर समाल मगर छन्।
एसपी रवीन्द्र रेग्मीका अनुसार बुधबार बिहान ९ बजेतिर ललितपुरको गोदावरी नगरपालिका वडा नम्बर-६ स्थित सडक बाटो किनारको नालीमा अपरिचित व्यक्ति घाइते लडिरहेको भन्ने सूचना प्रहरीले पाएको थियो।
उक्त सूचनाको आधारमा खटिएको प्रहरीको टोलीले विभिन्न स्थानीय व्यक्तिहरू र प्रहरीले उनलाई गोदावरी-६ स्थित नमस्ते मेट्रो अस्पतालमा उपचारका लागि पुर्याएका थिए।
प्रहरीको टोलीले अस्पतालमा पुगेर अनुसन्धान अघि बढाएको थियो।
उनीमाथि सोधपुछ गर्दा मंगलबार बिहान उनी कतारबाट फर्किएका थिए।
एसपी रेग्मीका अनुसार उनले राजस्व छली गरी सुन ल्याएका थिए। उनले ५० ग्रामको सुनको ब्रासलेट र २० ग्रामको सुनको औंठी ल्याएका थिए।
मंगलबार त्रिभुवन अन्तर्राष्ट्रिय विमानस्थलमा काठमाडौं आएपछि उनी दिउँसो १ बजे सौर्य एयरलाइन्समार्फत् भद्रपुर पुगेका थिए। उनी आफ्नो घरमा गएर सुनको ब्रासलेट र औंठी लुकाएका थिए। त्यहाँबाट फेरि साँझ साढे ६ बजे बुद्ध एयरको फ्लाइटमा काठमाडौं फर्किएका थिए।
बुधबार बिहान उनले आफैले आफैमाथि शरीरका विभिन्न भागमा चोट बनाएको एसपी रेग्मीले बताए। किनारमा रहेको नालीमा पुगेर आफ्नो हातखुट्टा आफैले बाँधेर सडक किनारमा बसेको अनुसन्धानबाट खुलेको हो।
प्रहरीले सिसिटिभी फुटेजहरू पनि केलाएको थियो। प्रहरीले अपहरण गर्ने व्यक्तिको खोजी गर्दा सिसिटिभी फुटेजमा रहेका कपडाहरू फरक परेका थिए।
‘विमानस्थलमा आइपुग्दा लगाएको कपडा र घटनास्थल आसपासका फुटेजमा फरक कपडा पायौं। कपडाका विषयमा सोधपुछ गर्दा उनले बताउन सकेनन्। त्यसपछि हामीलाई शंका लाग्यो,’ एसपी रेग्मीले भने, ‘झापातिर पनि बुझेपछि यसबारे खुल्यो।’
यसरी नाटक गरेको थाहा पाएपछि प्रहरीले इलाका प्रहरी कार्यालय अनारमनी बिर्तामोडको टोलीसँग समन्वय गरी प्रहरीले उनको घरबाट सुनका गहना बरामद गरेको छ।
यसबारे थप अनुसन्धान गर्न र कारबाहीका लागि उनलाई त्रिभुवन अन्तर्राष्ट्रिय भन्सार कार्यालय गौचरणमा बुझाएको छ।
