काठमाडौंमा एक पुरूषमाथि कुटपिट गरेको आरोपमा प्रहरीले दुई जनालाई पक्राउ गरेको छ।
काठमाडौं महानगरपालिका वडा नम्बर ३२ कोटेश्वरस्थित केएलसी क्लबअगाडि राजन बरूवाललाई अंगभंग हुनेगरी कुटपिट गरेको आरोपमा प्रहरीले दुई जनालाई पक्राउ गरेको हो।
गत फागुन १७ गते भएको घटनामा संलग्नलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको एसपी रवीन्द्र रेग्मीले जानकारी दिए। पक्राउ पर्नेमा काभ्रे घर भई इमाडोल बस्ने २६ वर्षीय मिलन तामाङ र काभ्रे घर भई भक्तपुर सल्लाघारी बस्ने २८ वर्षीय विजय लामा छन्।
उनीहरूले बरूवालाई कुटपिट गरी फरार भएका थिए। कार्यालयबाट खटिएको टोलीले आइतबार ललितपुरको महालक्ष्मीस्थानबाट फेला पारी पक्राउ गरेको हो।
मिलन तामाङमाथि यसअघि पनि विभिन्न कसुरमा मुद्दा चलेका छन्।
२०७३ फागुन १९ गते ललितपुरमा जुवा सम्बन्धी कसुर, २०७४ पुस २ गते नयाँ बानेश्वरमा ज्यान मार्ने उद्योग कसुर, २०७६ वैशाख ११ गते महाराजगञ्जमा अभद्र व्यवहार, २०७७ साल माघ १४ गते गौशालामा अभद्र व्यवहार र २०७७ माघ १८ गते गौशालामै चोरी डाँका सम्बन्धी कसुरमा कारबाही भएको प्रहरीले जनाएको छ।
-(1)-1716208570.JPG)
