पशुपतिनाथको भेटी चोरी गरेको आरोपमा पक्राउ परेका एक व्यक्तिले दुई-तीन महिनादेखि नै आफूहरूले भेटी चोरी गर्दै आएको बयान दिएका छन्।
सोमबार प्रहरी वृत्त गौशालाको टोलीले पशुपति विकास कोषका कर्मचारीसहित आठ जनालाई पक्राउ गरेको हो। पक्राउ परेकामध्ये तीन जना हाजिरी जमानीमा छाडिएका छन्।
हाल प्रहरी हिरासतमा भेटी संकलनको जिम्मा लिएका कोषका नायब सुब्बा नवराज ढोढारी, नवराज घिमिरे, बाजा बजाउने कर्मचारी अनिल परियार, कुमार परियार र सपटा कपाली छन्।
कोषाध्यक्ष नारायणप्रसाद सुवेदीले आफूलाई भेटी संकलन गर्ने ठाउँमा काम गर्ने जिम्मा लगाएको अनिल परियारले प्रारम्भिक बयानमा भनेका छन्।
‘मान्छे थिएन अनि कोषाध्यक्षज्यू हुनुहुन्छ नि! उहाँले केही पर्दैन काम गर भन्नुभएको थियो। कागज पनि आउँछ भन्नुभएको थियो। कागज चाहिँ आएको थिएन,’ उनले पक्राउ परेपछि भनेका थिए।
यसरी आफूहरूले चोरी नगर्ने भने पनि नवराज ढोढारीले भने बोलाएर चोरी गर्न लगाएको बताएका हुन्। उनले दुई/तीन महिनादेखि चोरी गर्दै आएको बताएका हुन्।
‘हामीले त नगर्ने भनेका हौं। तर हाकिम साबले फोन गरेर बोलाउनुभएको हो। नवराज ढोढारी। यस्तो काम नगर्ने भनेको तर गर् गर् भन्नुहुन्थ्यो,’ उनले भने, ‘उहाँहरूले कति लिनुहुन्छ हामीलाई भन्नुहुन्न। मलाई १०००-१५०० पाउँछु। दिनकै लैजान्छु। मैले लाँदा गन्दै गन्दिनँ। १०-१२ हजार लग्छौं। उनीहरूले छुट्टाएर दिन्छन्। दुई तीन महिना जस्तो भयो। काम नगर्ने भनिरहेका थियौं तर केही हुँदैन केही हुँदैन भनेर नवराज ढोडारी सरले भनेका थियौं।’
चोरी गर्नका लागि ज्याकेट लगाएर आउन भनेर भन्ने गरेको पनि उनले बताएका छन्। ज्याकेटमा लुकाएर लग्ने गरेको अनुसन्धानमा खुलेको हो। ढिलो आएमा ढोढारीले फोन गरेरै पनि बोलाउने गरेको गरेको पनि बताएका थिए।
प्रहरीले उनीहरूसँग आधिकारिक बयान लिएको भने छैन। यसबारे थप अनुसन्धान भइरहेको प्रहरी वृत्त गौशालाले जनाएको छ।
यसरी खुलेको थियो चोरी
पशुपतिमा भक्तजनहरूले चढाएको भेटी गन्ने क्रममा शंकास्पद गतिविधि देखिएपछि पशुपति क्षेत्र विकास कोषका कर्मचारीले प्रहरीलाई खबर गरेका थिए।
सोमबार साँझ संस्कृतिक संरक्षण महाशाखाको भेटी गणना कक्षामा पदाधिकारी, सुरक्षाकर्मीको संलग्नमा भेटी गन्ने काम भइरहेको थियो।
सिसिटिभीमा शंकास्पद गतिविधि देखिएपछि कोषका कर्मचारीले प्रहरीलाई खबर गरेर घटनास्थलमा पुगेको कोषका प्रवक्ता रेवतीरमण अधिकारीले जानकारी दिए।
उनकाअनुसार पशुपतिमा भेटी हराउँदै आएको कुरा सुन्दै आइएको थियो। तर प्रमाण फेला पार्न सकिएको थिएन। सोमबार प्रमाणसहित नियन्त्रणमा लिइएको हो।
सिसिटिभीमा अनुहार देखिएको थिएन। लुगाको आधारमा पहिचान गरि त्यहाँ सोधपुछ गर्दा एक व्यक्तिको साथबाट ८/१० हजार रकम भेटिएको छ।
रकम भेटिएको व्यक्तिलाई सोधपुछ गर्दा अन्य व्यक्तिहरूको नाम पनि खुलेको उनले बताए। उनीहरूले भेटी कक्षबाट लिएको पैसा बाहिर आएर बाँडफाड गर्ने गरेको बताएका छन्।
दैनिक ३ देखि ४ लाख रूपैयाँ भेटी संकलन हुने गरेको छ।
दिनभर संकलन भएको भेटी साँझ गनेर मेघा बैंकको कर्मचारीलाई बुझाउने गरिएको छ। भेटी गडबड हुन थालेपछि डेढ वर्षअघि भेटी गन्ने कक्षमा निगरानी गर्न थालिएको थियो। बाँदरले तारहरू काटिदिँदा सिसिटिभीमा समस्या आइरहन्छ।
'कहिलेदेखि यस्तो काम गर्दै आएका हुन्, को-को संलग्न छ भनेर अनुसन्धानमा खुल्छ,' प्रवक्ता अधिकारीले भने, 'लामो समयको कडा निगरानी पश्चात् प्रमाणसहित नियन्त्रणमा लिन सफल भएका छौं।'
-1714450921.jpg)
