काठमाडौंको कागेश्वरी मनहरा नगरपालिका वडा नम्बर ५ थलीमा मृत भेटिएका पुरूषको छोरा पनि फर्पिङमा घाइते अवस्थामा फेला परेका छन्।
मंगलबार बिहान कागेश्वरी मनहरा नगरपालिका वडा नम्बर ५ थलीमा चाँगुनारायण नगरपालिका वडा नम्बर ५ छालिङका कृष्ण नगरकोटी मृत अवस्थामा फेला परेको थिए।
उनको साथमा रहेको सवारी चालक अनुमति पत्रका आधारमा पहिचान खुलेको थियो। थप अनुसन्धानको क्रममा उनका छोरालाई फर्पिङबाट घाइते अवस्थामा नियन्त्रणमा लिएको जिल्ला प्रहरी परिसर काठमाडौं प्रवक्ता एसपी नवराज अधिकारीले जानकारी दिए।
'छोरालाई घाइते अवस्थामा भेटिएको हो।अनुसन्धान भइरहेको छ,' एसपी अधिकारीले भने।
मृतकका भाइ सहकुलका अनुसार छोरा हिजै राति चाल्नाखेलको जंगलमा फेला परेका थिए।
चाल्नाखेलका स्थानीयबासीले उनलाई फेला पारेपछि प्रहरीलाई खबर गरेका थिए। प्रहरीले नै उनको उद्धार गरेको थियो।
नगरकोटी शव मुलपानीबाट थलीतर्फ जाने सडकको बायाँतर्फको निर्माणाधीन पर्खालमा फेला परेको थियो। उनको शव नजिकै दुईवटा ब्लेडसमेत फेला परेको थली प्रहरीले बताएको छ।
