अख्तियार दुरूपयोग अनुसन्धान आयोगले सुरक्षण मुद्रण केन्द्रका कार्यकारी निर्देशक विकल पौडेलविरूद्ध गैरकानुनी सम्पत्ति आर्जन गरी भ्रष्टाचार गरेको आरोपमा विशेष अदालतमा मुद्दा दायर गरेको छ।
पौडेल २०७४ सालदेखि २०८० सालसम्म केन्द्रको कार्यकारी निर्देशक भएका थिए। उनले केन्द्रको कार्यकारी निर्देशक भइरहेकै बेला आफ्नो परिचय लुकाएर कमिसन एजेन्टको रूपमा समेत सम्पत्ति आर्जन गरेको भेटिएको अख्तियारले जनाएको छ।
अनुसन्धानको क्रममा उनको हटमेल इमेल अकाउन्टबाट प्राप्त सूचनाको अख्तियारले विश्लेषण गरेको थियो।
अख्तियारले पौडेलको अमेरिकास्थित बैंक अफ अमेरिकामा २८ करोड ९५ लााख ७५ हजार ६८९ रुपैयाँ जम्मा गरेको भेटिएको जनाएको छ। त्यस्तै, सिंगापुरको बानकोटेक कम्पनीबाट कमिसन बापत ९ लाख ९ हजार ४४१ डलर लिएको र अर्को एक कम्पनी इन्स्टासेफ इन्कर्पोरेसनबाट बिक्री बापत १ लाख ३९ हजार ९४६ अमेरिकी डलर प्राप्त गरेको जनाएको छ।
त्यस्तै, उनले सिंगापुरस्थित प्रुडियन्सल इन्स्योरेन्समा २ करोड ४४ लाख ६३ हजार ८२२ बराबरको जीवन बीमा गरेको समेत भेटिएको अख्तियारले जनाएको छ।
उनले सम्पत्ति लुकाउनका लागि नाटकीय रूपमा परिवारमा अंश बुझेको तर परिवारमा साथै बस्न थालेको समेत भेटिएको अख्तियारले विज्ञप्तिमा जनाएको छ।
अख्तियारले उनको आर्जन ६४ करोड २० लाख ६२ हजार ५७२ रुपैयाँको हिसाब निकालेको छ। उनको आर्जनको २ करोड १ लाख ४३ हजार आठ सय मात्र हिसाब भेटिएको तर ६२ करोड १९ लाख १८ हजार ६ सय ८४ को स्रोत नखुलेको जनाएको छ।
साथै, अख्तियारले विशेष अदालतमा उनलाई भ्रष्टाचार निवारण ऐनको दफा २० बमोजिम बिगो अनुसार कैद र बिगो बमोजिम जरिवानाको सजाय गरी जम्मा बिगो ६२ करोड १९ लाख १८ हजार ६ सय ८४ जफत र असुल उपर गर्न माग गरेको छ।