ललितपुरको ग्वार्कोमा गाडीको ठक्करबाट एक जनाको मृत्यु भएको छ।
बुधबार राति ९:५० बजे ललितपुर महानगरपालिका-१७ ग्वार्कोमा प्रदेश ०२-०१-००२ प ९१७५ नम्बरको मोटरसाइकललाई गाडीले ठक्कर दिएको थियो।
ठक्करबाट मोटरसाइकलमा सवार सिरहा घर भई काठमाडौंको कोटेश्वर बस्दै आएका ३२ वर्षीय जयनाथ यादव गम्भीर घाइते भएका थिए।
उनलाई तत्काल उद्धार गरी बिएन्डबी अस्पताल पुर्याइएकोमा उपचारका क्रममा राति ११ बजे मृत्यु भएको ललितपुर प्रहरी परिसरका सूचना अधिकारी एसपी नरेशराज सुवेदीले जानकारी दिए।
उनका अनुसार ठक्कर दिने गाडीबारे खुलिसकेको छैन।
घटनास्थल आसपासका सिसीटिभी क्यामेरा फुटेज हेर्दा टिपरले ठक्कर दिएको सम्भावना देखिएको एसपी सुवेदीले जानकारी दिए।
ठक्कर दिने गाडीको खोजी भइरहेको छ भने मृतक यादवको शव अस्पतालमै छ।
