मुगुको मुगमकार्मारोङ गाउँपालिका–२ डोल्फु गाउँमा हतियारसहितको समूह पसेर लुटपाट गरेको छ।
शनिबार राति भरुवा बन्दुकसहित ८–९ जनाको समूह गाउँमा पसेर स्थानीयलाई तर्साएर लुटपाट गरेको जिल्ला प्रहरी कार्यालय मुगुले जनाएको छ।
मुगुका प्रहरी प्रमुख प्रहरी नायव उपरीक्षक वीरेन्द्र थापाका अनुसार उक्त स्थानमा प्रहरी गएको छ। आइतबार नै जिल्लाबाट प्रहरी हिँडेको उनले जानकारी दिए।
‘स्थानीयहरु यार्सागुम्बा टिप्न गएका बेला गाउँमा ८–९ जनाको समूह आएर घरहरुमा लुटपाट गरेको खबर आएको छ, प्रहरी टोली पुगिसकेको छ, विवरण भने आइसकेको छैन,’ डिएसपी थापाले भने।
लुटेरा समूहले भरुवा बन्दुक देखाएर घरमा लुटपाट गरेको खबर आएको उनले बताए।
घटना भएको डोल्फु गाउँ सदरमुकामदेखि साढे २ दिनको पैदल दूरीमा पर्छ।
युवाहरु यार्सागुम्बा टिप्न पाटन गएको र घरमा बुढापाका मात्र भएको मौका छोपेर लुटेरा समूह गाउँ पसेको उनले जानकारी दिए।
लुटेरा समूहले घरमा भएका कुकुरहरुलाई गोली हानेर मारिदिएको पनि खबर आएको प्रहरीले जनाएको छ।
-1746009348.jpg)
