ताप्लेजुङको सिरीजंघा गाउँपालिकाले स्थानीय कृषि तथा रोजगार प्रबर्द्धनका लागि पालिकाभित्रै सार्वजानिक निजी साझेदारी मोडलमा आगामी आर्थिक वर्षभित्र फलफुल जुस उत्पादन कम्पनी निर्माण गर्ने भएको छ।
गाउँपालिकाको १५ औं गाउँसभामा आगागी आर्थिक वर्ष २०८१।०८२ का लागि प्रस्तुत नीति तथा कार्यक्रममा उक्त परियोजनालाई उच्च प्राथमिकताका साथ पहिलो नम्बरमै समावेश गरिएको छ।
चालु आर्थिक वर्षमै पालिकामा उत्पादित फलफूलहरुलाई प्रशोधन गरी जुस उत्पादन गर्न विस्तृत परियोजना प्रस्ताव (डिपीआर) तयार भइसकेको र आगामी आर्थिक वर्षमा विगतदेखि नै पालिकामा संचालित 'सिरीजंघाको सान, उद्यमशील किसान' कार्यक्रमलाई निरन्तरता दिँदै जुस उत्पादन कम्पनीका लागि आवश्यक पर्ने फलफूल खेतीलाई थप प्रभावकारी बनाउन किबीको नर्सरी,बेर्ना उत्पादन र विस्तारमा समेत जोड दिइने बताइएको छ।
यसैगरी याम्फुदिनको आम्जी खोलाबाट नयाँ झोरेनी, चैराम हुदै विश्वको तेस्रो सर्वोच्च शिखर कंचनजंघाको बेस क्याम्प(केबिसी)सम्म जाने निर्माणाधीन साहसिक पदमार्गलाई पालिकाको गौरव आयोजनाको रुपमा निरन्तरता दिइने र चालु आर्थिक वर्ष २०८०।०८१ मा गरिएको अध्ययन प्रतिवेदन अनुसार सो साहसिक पदमार्गअन्तर्गत कम्तिमा २ स्थानमा व्यवसायीहरुसंगको साझेदारीमा होम स्टे स्थापना गर्नका लागि आवश्यक बजेटको व्यवस्था गरिने भएको छ।
पालिकामा निर्माणाधीन १० शय्याको आधारभुत अस्पताल भवन निर्माण सम्पन्न भई आगामी आर्थिक वर्षभित्रै संचालनमा आउने, सिरीजंघा गाउँपालिकामा रहेको नेपालको पहिलो तथा एक मात्र लिम्बू संग्राहलय समेतलाई समेटेर मुन्धुम पर्यटन पार्क निर्माणका लागि विस्तृत परियोजना प्रस्ताव(डिपीआर) तयार गरी निर्माणका लागि पहल गर्ने नीति तथा कार्यक्रममा उल्लेख छ।
आर्थिक वर्ष २०८१।०८२ का लागि सिरीजंघा गाउँपालिका अध्यक्ष लालकृष्ण चौहानले १०६ बुँदे नीति, योजना तथा कार्यक्रम प्रस्तुत गरेका थिए।
पालिकाका उपाध्यक्ष चित्रकुमार मावोले सिरीजंघामा कृषि तथा फलफुल उत्पादनमा प्रचुर संभावना रहेको बताउँदै गाउँमै रोजगार प्रवर्द्धन र युवाहरुलाई उत्पादनसंग जोड्नका लागि पालिकाले सार्वजनिक निजी साझेदारी मोडलमा जुस उत्पादन उद्योग संचालन गर्न लागेको बताए।
यसबाट युवा पलायन रोक्न समेत सहयोग पुग्ने विश्वास गाउँपालिकाले लिएको छ।
