शनिबार दिउँसो नेपालको पूर्वी भूभागदेखि सुदूरपश्चिमसम्मका विभिन्न ठाउँमा पानी परेको छ।
जल तथा मौसम विज्ञान विभागकाअनुसार अहिले पूर्वमा धनकुटा, तेह्रथुम, भोजपुर, संखुवासभा, ओखलढुंगाका केही स्थानहरूमा पानी परिरेहको छ।
धनकुटाको लेगुवाघाटमा पछिल्लो तीन घन्टामा ३३.८ मिलिमिटर वर्षा भएको छ। पाँचथरमा १४ मिलिमिटर, सिन्धुलीमाढीमा १२.६ मिलिमिटर, सिन्धुपाल्चोकमा १२.८ मिलिमिटर, धादिङको धुनीवेशीमा १९.२ मिलिमिटर वर्षा भएको छ।
त्यस्तै तनहुँको बन्दीपुरमा १८ मिलिमिटर, चितवनमा कालीखोलामा १२.४ मिलिमिटर, देवघाटमा १५.४ मिलिमिटर, गुल्मीको भर्सेमा २०.८ मिलिमिटर, दाङको लुवामझुला बजारमा २१.८ डिग्री सेल्सियस वर्षा भएको छ।
सुदूरपश्चिमका डोटी, डडेलधुरामा पनि मध्यम वर्षा भइरहेको छ। महाशाखाका अनुसार दिपायलमा पछिल्लो तीन घन्टामा १७.४ मिलिमिटर वर्षा भएको छ।
डडेलधुराको अमरगढी आसपास २६.४ मिलिमिटर वर्षा भएको छ। अन्य ठाउँका पहाडी भूभागहरुमा पनि शनिबार हल्का वर्षा भएको छ।
वर्षाका कारण पहाडी भूभागमा तापक्रम केहि घटेको छ। पश्चिम तराईका भूभागहरुमा भने पानी परेको छैन। पहाडी भूभागमा पानी पर्दा त्यसको प्रभावले तराईमा तापक्रम केही घटेपनि गर्मी भने घटेको छैन।
शनिबार अपराह्न नेपालगन्जमा ४० र धनगढीमा ३९ डिग्री तापक्रम रहेको मौसमविद रोजन लामिछानेले जानकारी दिए।
पश्चिम तराईका भूभागहरुमा तत्काल पानी पार्ने प्रणाली आउने नदेखिएकाले तापक्रम त्यति धेरै नघट्ने उनले बताए ।
काठमाडौं उपत्यकामा पनि शनिबार वर्षा हुँदा गर्मीबाट राहत महशुस भएको छ। काठमाडौंमा बदली हुने र क्षणिक वर्षा हुने क्रम केही दिन चलिरहने पनि उनले बताए।
मौसमविद लामिछानेले स्थानीय वायु र पश्चिमी वायुको प्रभावका कारण पानी परेको बताएका छन्। मनुसन अहिले नआएको र आउने आइहाल्ने अवस्था पनि नदेखिएको उनले बताए।
यसपालि सरदरभन्दा चाँडो मनसुन भित्रने पूर्वानुमान भने महाशाखाले यसअघि नै गरेको थियो। अहिले भारतको सिक्किम आसपास मनसुनी प्रणाली रहेको महाशाखाले जनाएको छ।
