भारतमा बेच्न लैजाँदै गरेको अवस्थामा बालिकालाई प्रहरीले ललितपुरबाट उद्धार गरेको छ।
मानव बेचबिखन अनुसन्धान ब्युरोको टोलीले ललितपुरको महानगरपालिका-२७ सुनाकोठीबाट १४ वर्षीया बालिकाको उद्धार गरेको एसपी ज्ञानेन्द्रप्रसाद फुयालले जानकारी दिए।
ब्युरोले यसबारे सोमबार पत्रकार सम्मेलन गरी सार्वजनिक गरेको हो।
यसरी बेचबिखन गरेको आरोपमा प्रहरीले दुई जनालाई पक्राउ गरी सार्वजनिक समेत गरेको छ।
नुवाकोट दुप्चेश्वर गाउँपालिका-६ घर भई काठमाडौं तारकेश्वर नगरपालिका-७ बस्ने ३९ वर्षीय सम्बरबहादुर तामाङ र नुवाकोट तादी गाउँपालिका-२ घर भई टोखा नगरपालिका-२ बस्ने ३३ वर्षीया इन्दिरा कटुवाल (तामाङ) पक्राउ परेका हुन्।
एसपी फुयालका अनुसार उनीहरू र १४ वर्षीया बालिकाको नजिकैको आफन्तमार्फत् चिनजान भएको थियो। बालिकाको घरको आर्थिक अवस्था कमजोर थियो।
त्यसको फाइदा उठाउने उद्देश्यले उनीहरूले बालिकालाई पोखरामा होटलमा वेट्रेसको काममा लगाइदिने भनेर काठमाडौंको तार्केश्वर नगरपालिका-७ फुटुङस्थितबाट ल्याएर ललितपुरको सुनाकोठी पुर्याएका थिए। उनलाई सुरूको महिनामा २० हजार तलब दिने र पछि तलब बढाउने भनेर प्रलोभन लिएका थिए।
बालिकालाई भारतको पुणेस्थित कोठीमा बेच्न लग्न लागेको भन्ने सूचना प्रहरीले पाएको थियो। उक्त सूचनाको आधारमा खटिएको ब्युरोको टोलीले शनिबार उद्धार गरेको हो।
त्यहीँ रहेका सम्बरबहादुरलाई प्रहरीले पक्राउ गरेको थियो। यसमा संलग्न अर्की महिलालाई आइतबार टोखाबाट पक्राउ गरिएको हो।
पक्राउ परेका उनीहरूले बालिकालाई कसैले सोधे आफ्नो वास्तविक नाम, थर, ठेगाना र व्यक्तिगत पहिचान खुल्ने कागजात नदेखाउन भनेर फकाएका थिए।
एसपी फुयालका अनुसार अर्कै एक जना महिलाको नागरिकता बालिकालाई दिइएको थियो।
कसैले सोधे आफू बिना तामाङ हो भन्न सिकाइएको थियो।
‘नागरिकता पनि अर्कै व्यक्तिको थमाइएको थियो। कसैले सोधे आफ्नो नाम पनि अर्को हो भन्ने खालको कुरा गर्न लगाइएको थियो,’ उनले भने।
ती बालिकालाई ललितपुरको चापागाउँ हुँदै हेटौंडा, वीरगंज, रक्सौल हुँदै पुणे पुर्याउने तयारी थियो।
पक्राउ परेका सम्बरबहादुर यसअघि पनि पक्राउ परिसकेका व्यक्ति हुन्। उनी १० वर्ष कैद सजाय भुक्तान गरी गत वर्ष वैशाखमा मात्रै थुनामुक्त भएका थिए।
उनीबाट पनि दिनेश थकुरा तामाङ नामको भारतीय आधार कार्ड बरामद भएको छ। त्यस्तै, १३ हजार ९०० भारतीय रुपैयाँ पनि बरामद भएको छ।
बिना तामाङको नाममा रहेको नागरिकता र ७ हजार ३१० रुपैयाँ पनि बरामद भएको छ।
सम्बरबहादुरले भारतमा वेश्यालय सञ्चालन गरी बस्ने एक जना महिलालाई भारतीय नम्बरबाट खोलेको ह्वाट्सएपमार्फत पटकपटक कुराकानी गरेको अनुसन्धानमा देखिएको छ।
प्रहरीले यसमा संलग्न अन्यको खोजी गरिरहेको छ।