ललितपुरमा चोरी गरेको आरोपमा प्रहरीले पाँच जनालाई पक्राउ गरेको छ।
ललितपुर महानगरपालिका वडा नम्बर १८ ऐतिहासिक ढुंगेधारामार्गस्थित सिर्जना वैद्यको घरमा चोरी गरेको आरोपमा प्रहरीले पाँच जनालाई पक्राउ गरेको हो।
जेठ २ गते उनको घरमा चोरी भएको थियो। घरबाट ०.७५ मिलिग्रामको मुद्रा, अमेरिकन डलर र कम्बोडियन डलर चोरी भएको थियो।
त्यस्तै रियलमीको मोबाइल र ६ तोला ७० लालको सुनको ढिक्का पनि चोरी भएको थियो।
त्यस घरमा चोरी गरेको आरोपमा प्रहरीले भोजपुर घर भई काठमाडौं-२४ किलागल बस्ने ३० वर्षीय सीताराम लकान्द्रे, रामेछाप घर भई स्वयम्भू बस्ने ३७ वर्षीय सुजनकुमार सुनुवार, नुवाकोट घर भई शेषमति बस्ने ४० वर्षीय कुमार रानामगर, दोलखा घर भई थली बस्ने ४० वर्षीय वीरबहादुर श्रेष्ठ र असन बस्ने ४२ वर्षीय सुनिल श्रेष्ठ छन्।
पक्राउ परेका आरोपीहरू पटके हुन्।
उनीहरू पटकपटक चोरीका मुद्दामा पक्राउ परिसकेका व्यक्तिहरू हुन्।
जिल्ला प्रहरी परिसर ललितपुरका एसपी नरेशराज सुवेदीका अनुसार वीरबहादुरविरूद्ध २० वटा मुद्दा चलिसकेको छ।
उनीविरूद्ध १२ वटा चोरी, ३ वटा डाँका चोरी, एउटा लागुऔषध र चार वटा अभद्र व्यवहारको कसुरमा मुद्दा चलिसकेको हो।
त्यस्तै अर्का आरोपी कुमार रानामगरविरूद्ध पनि ६ वटा चोरी मुद्दा चलिसकेको छ।
सुजन कुमार ७ वटा चोरी र एउटा लागुऔषध मुद्दामा अनुसन्धान भई पक्राउ परिसकेका व्यक्ति हुन्।
त्यस्तै चोरीकै मुद्दामा सुनिल श्रेष्ठ हाल कारागारमा छन्। उनी ८ वटा चोरी, दुई वटा डाँका चोरी, एउटा लागु औषध र तीन वटा अभद्र व्यवहार कसुरमा पक्राउ परिसकेका व्यक्ति हुन्।
‘उनीहरू पेशेवर चोरी गर्नेहरू हुन्। मुद्दा चलेर धरौटी माग हुने र धरौटी बुझाएर छुटेसँगै पुन: त्यही काममा संलग्न हुने गरेका छन्,’ एसपी सुवेदीले भने, ‘सुनिल यसपटक धरौटी बुझाउन नसकेर केही दिन अघिमात्रै कारागार गएका हुन्।’
