नवलपरासी (बर्दघाट–सुस्ता पूर्व) को कावासोतीमा ड्रेन निर्माणका लागि खाल्डो खन्दै गर्दा माटोले पुरिएर दुई जना मजदुरको मृत्यु भएको छ।
फलफूल चोकदेखि पूर्वतिर ड्रेन निर्माणका लागि काम गरिरहेका मजदुरहरू माटोले पुरिएका हुन्।
घटनामा अर्का एक मजदुर गम्भीर घाइते भएर अस्पतालमा उपचाररत छन्।
जिल्ला प्रहरी कार्यालयका डिएसपी वेदबहादुर पौडेलका अनुसार गम्भीर घाइते अवस्थामा उद्धार गरिएका तानमाया गाहा मगर र सोती रानाको
जिल्ला अस्पताल डण्डा पुर्याएपछि मृत्यु भएको हो।
अर्की मजदुर चमेली दर्लामी मगरलाई खोज्न समय लागेको थियो। उनको अहिले जिल्ला अस्पताल डण्डामा उपचार भइरहेको छ।
उनीहरू तीनै जना कावासोतीकै हुन्। घटना बिहीबार साँझ साढे ६ बजेतिर भएको हो।
कावासोती नगरपालिकाले पूर्व–पश्चिम महेन्द्रराजमार्गदेखि उत्तरतर्फ पानीको निकासको लागि करिब ४ मिटर गहिरो ड्रेन बनाउँदै थियो। राजमार्ग किनारमै नाला खन्दा नगरपालिका र ठेकेदारले पर्याप्त सावधानी नअपनाएको भन्दै स्थानीय बासिन्दाले विरोध गरेका छन्।