काठमाडौं महानगरपालिकाले स्मार्ट पार्किङ हटाएपछि न्यूरोडका सडक खुला थिए। मानिसहरू सहजै आवताजावत गर्थे। न्यूरोडमा ट्राफिक जाम कम हुँदै गएको थियो।
मेयर बालेन शाह न्यूरोड क्षेत्रलाई 'भेहिकल फ्री जोन' बनाउने योजनामा थिए। त्यसैले स्मार्ट पार्किङ गर्न ठेक्का पाइरहेको कम्पनी ह्विल ट्रुली योर्ससँग सम्झौता सकिएपछि महानगरले नवीकरण नै गरेन।
महानगरले गत माघ ९ गतेदेखि न्यूरोडमा पार्किङ हटायो। नगर प्रहरी परिचालन गरेर पार्किङ रोक्यो। यो क्रम लामो समय चले पनि दीर्घकालीन रूप लिन सकेन।
त्यति बेला गाडी, ट्याक्सी र मोटरसाइकल रोकेर राख्न दिँदैनथ्यो। 'पिक एण्ड ड्रप सिस्टम' लागू गरेको थियो। कोही यतिकै बाइक रोकेर बसेको देखे नगर प्रहरीले सिट्ठी फुकिहाल्थ्यो, सवारीसाधन पार्किङ कम हुँदै गएको थियो।
यसले अर्कातर्फ बाटोमा गुड्ने सावरीसाधनलाई प्रशस्त ठाउँ दिएको थियो। जसले गर्दा ट्राफिक जाम कम भएको हो।
तर पछिल्लो समय जथाभाबी गाडी रोक्न थालिएको छ। खासगरी साँझको समय ट्याक्सी र निजी कारसमेत बाटोछेउ लस्करै रोकेर राखिएका हुन्छन्। मोटरसाइकल पनि त्यसरी नै रोकिएका हुन्छन्।
पहिलेजस्तो पार्किङ नभए पनि लामो समय सडक किनार रोकेर राखिने ट्याक्सी, निजी कार र मोटरसाइकलको लस्करले न्यूरोडलाई फेरि साँघुरो बनाएको छ। त्यहाँ पहिलेजस्तो सवारीसाधन रोक्नेलाई सिट्ठी फुकेर हटाउन नगर प्रहरीहरू पनि छैनन्।
यति मात्र होइन, पार्किङ हटेर सडक चौडा भएपछि सवारी साधनले जथाभाबी 'यू टर्न' गर्न थालेका छन्। यसले दुर्घटना जोखिम बढाउँछ। नियम नमान्ने सवारी चालकलाई कारबाही गर्न नगर प्रहरी र ट्राफिक प्रहरीले सक्रियता देखाएका छैनन्।
गाडीहरूलाई सडक किनार रोक्न नदिने हो भने पनि न्यूरोड धेरै फराकिलो हुन्छ। साँझ सहर घुम्न निस्केकाहरू सडकमै हिँड्न सक्छन्।
केही समयदेखि न्यूरोड क्षेत्रमा जथाभाबी गाडी रोकिएको देखेपछि हामीले महानगर प्रहरी प्रमुख राजुनाथ पाण्डेलाई न्यूरोडमा फेरि पार्किङ गर्न दिएको हो भनेर सोधेका छौं।
पाण्डेका अनुसार न्यूरोड क्षेत्रमा अहिले पनि पार्किङ गर्न दिइएको छैन। 'त्यहाँ पार्किङ हुने गरेको छैन,' उनले भने, 'पिक एण्ड ड्रप सिस्टम नै लागू छ।'
पहिलेझैं सवारी साधन रोक्न नदिन नगर प्रहरीहरू किन देखिँदैनन् भन्ने प्रश्नमा उनले नगर प्रहरी अन्य ठाउँमा गएकाले नदेखिएको प्रतिक्रिया दिए।
'नगर प्रहरीको संख्या कम छ। अन्य ठाउँको काममा गएको बेला हुनसक्छ,' उनले भने, 'हामी एक्लैले मात्र गर्न खोजेर पनि सम्भव छैन, त्यसमा ट्राफिक प्रहरीको उत्तिकै भूमिका हुन्छ।'
पटक पटक ट्राफिक व्यवस्थापन कार्यालयसँग समन्वयका लागि गुहारेको उनले बताए। जबसम्म न्यूरोडमा पार्किङ 'फ्रि' बनाउन ट्राफिक प्रहरीले कडाइसाथ भूमिका खेल्दैन, तबसम्म नगर प्रहरीको एकल प्रयासले मात्र दीर्घकालीन नहुने उनले बताए।
महानगरले न्यूरोडका पार्किङको विकल्पमा धरहरा र काठमाडौं टावरमा निःशुल्क पार्किङ उपलब्ध गराउँदै आएको छ।