सल्यानमा टिपरले मोटरसाइकललाई ठक्कर दिँदा दुई जना गम्भीर घाइते भएका छन्।
घाइते हुनेमा बागचौर नगरपालिका–८ कोटमौलाका २५ वर्षीय मोटरसाइकल चालक खगेन्द्र बिक र पछाडि सवार २९ वर्षीय मनविर बिक रहेको सल्यानका प्रहरी प्रमुख डिएसपी नवीन कार्कीले जानकारी दिए।
उनका अनुसार राप्ती राजमार्ग अन्तर्गत छत्रेश्वरी गाउँपालिका-६ कल्लेखोला नजिकै रा १ ख २२२४ नम्बरको टिपरले रा ४ प ९२२६ नम्बरको मोटरसाइकललाई ठक्कर दिएको थियो। सोही क्रममा उनीहरू घाइते भएका हुन्।
'उनीहरू परीक्षा दिएर घर फर्किने क्रममा टिप्परले ठक्कर दिएको रहेछ,' उनले भने, 'पछाडि सवार मनविरको अवस्था गम्भीर छ।'
घाइतेको उपचारका लागि दाङको तुलसीपुरस्थित राप्ती प्रादेशिक अस्पतालमा पठाइएको छ।
यस्तै, टिपर चालक ईलाका प्रहरी कार्यालय लुहामको नियन्त्रणमा रहेको डिएसपी कार्कीले बताए।
