देशको पूर्वी भू–भागमा मनसुनी वायुको सक्रिय प्रभाव देखिएको छ। जसका कारण कोशी प्रदेशका तराईका भूभागमा भारी वर्षा भइरहेकाले जल तथा मौसम विज्ञान विभागले तटीय क्षेत्रका मानिसहरूलाई सतर्क रहन भनेको छ।
पछिल्लो २४ घन्टामा मोरङको लेटाङमा १८३ मिलिमिट वर्षा भएको छ। त्यस्तै झापाको कन्काइमा १४२.६ र मैनाचुलीमा १३१.८ मिलिमिटर पानी परेको छ। यता सुनसरीको धरानमा पनि भारी वर्षा मापन भएको छ। त्यहाँ पछिल्लो २४ घन्टामा १३९.४ मिलिमिटर वर्षा भएको छ।
त्यसो त अहिले कोशी, मधेस, बागमती र गण्डकीका अधिकांश भूभागमा वर्षात् भइरहेको छ।
कोशीमा मनसुनी वायुको प्रभाव हो भने काठमाडौं उपत्यका आसपासचाहिँ पोखरामा विकास भएको प्रणाली सक्रिय भएको वरिष्ठ मौसविद् प्रतिभा मानन्धरले जानकारी दिइन्।
उनका अनुसार पोखरामा सोमबार साँझदेखि नै प्रणाली बनेको थियो। यो प्रणाली केहीबेर अझै सक्रिय रहनेछ।
पछिल्लो तीन घन्टामा सिन्धुपाल्चोकको ढुंगेमा ३७ मिलिमिटर वर्षा भएको छ। काठमाडौं उपत्यकामा भने मध्यम प्रकृतिको वर्षा भइरहेको छ।
सरदरको समयभन्दा छिटो भित्रिएको मनसुनी वायु भने कोशी प्रदेश अन्यत्र विस्तारित नभइसकेको वरिष्ठ मौसमविद् मानन्धरले बताइन्।
‘विभिन्न प्यारामिटर हेर्दा कोशीबाट अन्यत्र विस्तार भइसकेको छ भन्ने अवस्था छैन। काठमाडौं आइसकेको छ कि छैन भनेर बुधबारसम्म भन्ने अवस्था हुन्छ,’ उनले भनिन्, ‘काठमाडौं आइसकेपछि पनि देशभर सक्रिय हुन थप चार–पाँच दिन लाग्छ,’ उनले भनिन्।
