रौतहटमा एक जना वृद्ध मृत फेला परेका छन्।
बुधबार बिहान साढे ८ बजेतिर गौर नगरपालिका वडा नम्बर ५ कोइरी टोलस्थित खेतमा ७४ वर्षीय अनिरूद्ध महतोको शव फेला परेको जिल्ला प्रहरी कार्यालयकी डिएसपी एलिजा गिरीले जानकारी दिइन्।
उनकाअनुसार मृतक महतोको हात र पेटमा चोट देखिएको छ। घटनास्थलबाट कुनै हतियार भने फेला परेको छैन।
मृतक सोही खेतनजिकै रहेको एक पक्की गोठमा बस्ने गर्थे।
डिएसपी गिरीका अनुसार उनको घरमा छोरा-बुहारी बस्छन्। खाना खान छोरा-बुहारी बस्ने घरमै गए पनि बेलुकी सुत्न भने उनी गोठमा आउने गरेका थिए।
‘हिजो बेलुकी पनि खाना खाएर गोठमा बस्न आएका रहेछन्,’ डिएसपी गिरीले भनिन्, ‘बिहान खेतमा शव फेला परेको छ, अनुसन्धान हुँदैछ।’
प्रहरीको प्रारम्भिक अनुसन्धानबाट मृतक लागुऔषध सेवनकर्ता र कारोबारमा समेत संलग्न भएको हुन सक्ने देखिएको छ।
मृतकको शरीरबाट प्लास्टिकका साना पोकामा गाँजा फेला परेको छ। उनी सुत्ने कोठामा पनि स-साना गाँजाका पोका फेला परेको प्रहरीले जनाएको छ।
यद्यपि उक्त गाँजा कति मात्रामा रहेको भन्ने खुलिसकेको छैन। जिल्ला प्रहरी कार्यालय रौतहटले घटनाको अनुसन्धान अघि बढाएको छ।
