नक्कली भुटानी शरणार्थी प्रकरणमा पक्राउ परेका बेचन झाले पोलिग्राफ टेष्ट गर्न अस्वीकार गरेको खुलेको छ।
काठमाडौं सरकारी वकिल कार्यालयले जिल्ला अदालत काठमाडौंमा उनीविरूद्ध ठगी, लिखत कीर्ते, राज्यविरूद्ध र संगठित अपराध सम्बन्धी कसुरमा मुद्दा दायर गरेको हो। सरकारी वकिल कार्यालयले उनीविरूद्ध मंगलबार मुद्दा दायर गरेको हो।
उक्त प्रतिवेदनमा उनले पोलिग्राफ परीक्षण गर्न नमानेको उल्लेख गरिएको छ। यद्यपि उनले आफ्नो अडिओ परीक्षण गर्न भने अनुमति दिएका छन्। गत असार १४ गते बेचन झालाई प्रहरीले पक्राउ गरेको थियो।
प्रतिवादी रामशरण केसीले प्रहरीलाई झासँगको संवाद पनि प्रहरीलाई बुझाएका छन्। त्यसमा भनिएको अडिओ आफ्नो नरहेको र आफूलाई त्यसबारे पनि जानकारी नभएको बताएका हुन्।
‘अडियोहरूमा भएको संवाद मेरो होइन। भिडिओमा देखिएको व्यक्तिहरू को-को हुन् मलाई थाहा भएन। म मेरो आवाज परीक्षण गर्न म मन्जुर छु,’ उनले भनेका छन्।
रामशरण केसीले आफूलाई यस प्रकरणका मुख्य व्यक्ति सानु भण्डारीले मन्त्रिपरिषदबाट निर्णय गराउनका लागि झाले रकम माग गरेको भन्ने बयान दिएका थिए। उनीसँग प्रहरीले पुन: कागज समेत गराएको छ।
‘मैले २०७८/०८/८ गते राति ८ बजे मेरो नामको हिमालयन बैंको खाताको दुई करोडको चेक लिने बेचन झा नाम गरेका व्यक्ति हाल मेरो सामुन्ने उपस्थित भएका यिनै व्यक्ति हुन्,’ केसीले भनेका छन्, ‘उनी त्यतिबेला बानेश्वरमा बस्थे। भुटानी शरणार्थीको नाममा नेपालीहरूलाई अमेरिका लैजानका लागि २०७८/०८/१३ गतेको मन्त्रिपरिषदको बैठकबाट केही निर्णयहरू हुन लागेको छ उक्त निर्णय गराउन झाले केही रकमहरू मागेका छन्। उनलाई चेक काटेर दिनु सो चेक ग्यारेन्टीको लागि मात्रै हो। चेक नदिए काम हुँदैन भनेर मलाई सानु भण्डारीले भनेका थिए।’
त्यसपछि उनले दुई करोडको चेक झालाई नै दिएको बताएका छन्। त्यसको भिडिओ समेत रहेको र त्यतिबेला उनले निलो रंगको ट्र्याकमा बाहुला र सुरूवालको साइडमा सेतो धर्का भएको कपडा र स्पोर्ट जुत्ता र सेतो रंगको टोपी लगाएको बयानमा भनेका छन्।
त्यसपछि मन्त्रिपरिषदको बैठकको निर्णय भए/नभएको भन्नेबारे बुझ्न पनि आफूले उनीसँग कुराकानी गरेको बताएका छन्। त्यसको अडिओ पनि प्रहरीलाई बुझाएका छन्।
यस्तै सो बैंक ग्यारेन्टी बापतको नगद रकम झाले अर्का प्रतिवादी हरिभक्त महर्जनबाट पनि लिएको केसीले बताएका छन्।
‘मबाट पाएको चेक कुनै पनि बैंकमा पेश गरेको मलाई जानकारी छैन। तर सो बखत ग्यारेन्टीको लागि भनि मेरो नामको चेक दिएकोमा सो चेक बराबरको रकम अर्का प्रतिवादी हरिभक्त महर्जनबाट यिनै झाले नगदै लिएको भन्ने जानकारी म र हरिभक्त महर्जन पक्राउ परी अदालतमा थुनछेकको लागि पेश भएका बखत खाजा ब्रेकको समयमा मलाई महर्जनले भनेका थिए,’ उनले कागजमा भनेका छन्।
बेचन झाले भने नक्कली भुटानी शरणार्थी प्रकरणमा आफ्नो संलग्नता नभएको बताएका छन्।
उनले भुटानी शरणार्थी सम्बन्धमै आफूलाई केही जानकारी नभएको बताएका छन्। उनले टेकनारायण पाण्डे, श्यामकृष्ण श्रेष्ठ, हरिभक्त महर्जन लगायतलाई नचिनेको भनेर बयान दिएका छन्।
उनले अरूले के बयान दिएको भन्नेबारे आफूलाई सरोकार नभएको पनि बताएका छन्। उनले हरिभक्तबाट पनि रकम नलिएको र भिडिओमा देखिएको भनिएका व्यक्तिहरू पनि नचिन्ने बताएका छन्।
