सर्लाहीमा खोला तर्ने क्रममा एक जनाको डुबेर मृत्यु भएको छ भने एक जना बालिका बेपत्ता भएकी छन्।
बलरा नगरपालिकास्थित रहेको मनुसमारा खोलामा डुबेर वडा नम्बर १ स्थित हथिऔल गाउँका ६० वर्षीय गजेन्द्र साहको मृत्यु भएको प्रहरीले जनाएको छ।
खोलामा डुबेर १२ वर्षीया निशा कुमारी गिरी बेपत्ता भएको र उनको खोजीकार्य जारी रहेको जिल्ला प्रहरी कार्यालय सर्लाहीका प्रवक्ता डिएसपी दिपककुमार श्रेष्ठले बताए।
उनका अनुसार निशा आज दिउँसो १ बजेतिर साथीहरूसँग खोला तरेर घाँस काट्न जाँदै थिइन्। त्यसै बेला मनुसमारा खोला तर्ने क्रममा निशा र उनकी साथी खोलामा डुबिरहेको देखेपछि गजेन्द्र बचाउन गएका थिए। त्यसै क्रममा उनको डुबेर मृत्यु भएको हो।
उनको शव पोष्टमर्टमका लागि प्रादेशिक अस्पताल मलंगवा पठाइएको प्रहरीले जनाएको छ।
निशासँगै घाँस काट्न हिँडेकी १५ वर्षीया पिंकी कुमारी गिरी भने पौडी खेलेर खोलाबाट सकुशल निस्किन सफल भएको प्रहरीले जनाएको छ।
