नेपाल कृषि अनुसन्धान परिषद् (नार्क) का वैज्ञानिक कर्चमारीहरू बुधबारदेखि आन्दोलनमा उत्रेका छन्।
आफूहरूमाथि असमान तलबमान कायम राखिएको भन्दै वैज्ञानिक कर्मचारीहरूले अतिआवश्यक बाहेकका सबै कामकाज बन्द गरेका छन्।
पशुपन्छी तथा माछाको दानापानी, बालीनालीमा सिँचाइ, मलखाद तथा औषधि उपचार बाहेकका सबै सेवा बन्द गर्नुका साथै नार्कका निमित्त निर्देशक दोजराज खनालको कार्यकक्षमा तालाबन्दी गरिएको छ।
आफूहरूलाई प्रशासनिक कर्मचारीहरूको भन्दा कम तलबलगायत सेवा सुविधा दिइएको वैज्ञानिक कर्मचारीको भनाइ छ।
सो सम्बन्धी रिटमा पाटन उच्च अदालतले समानताको आधारमा तलबमान निर्धारण गरी कार्यान्वयन गराउन परमादेश जारी गरे पनि व्यवस्थापन पक्ष उदासिन देखिएको भन्दै वैज्ञानिक कर्मचारीहरू आन्दोलनमा उत्रेका हुन्।
नार्कका वैज्ञानिक तथा प्राविधिक र प्रशासनिक कर्मचारी बीचको तलबलगायत सेवा सुविधा विगतमा समान रहे पनि २०५७ साल साउन १ गतेपछि अन्यायपूर्ण तरिकाले वैज्ञानिक तथा प्राविधिक कर्मचारीको तलबमान कम गरिएको आन्दोलनरत कर्मचारी बताउँछन्।
